वाल्हे, ता. १९ : वाल्हे (ता. पुरंदर) येथील ग्रामदैवत श्री भैरवनाथ मंदिरामध्ये मार्गशीर्ष दर्शवेळा आमवस्येनिमित्त ‘नाथ साहेबाचं चांगभलं’च्या जयघोषात श्री भैरवनाथांना पहाटे अभिषेक घालण्यात आला. त्यानंतर मंदिराचा मुख्य गाभारा भाविकांसाठी दर्शनासाठी खुला करण्यात आला.
शनिवारी (ता. १९) आषाढ दर्शवेळा आमावस्या असल्याने नेहमीपेक्षा मोठी गर्दी होती. आमावस्येनिमित्त ग्रामदैवत मंदिरामध्ये धार्मिक विधी करण्यात आल्या. सायंकाळी ग्रामस्थांच्या उपस्थितीत पारंपारिक ढोलाच्या निनादात श्री भैरवनाथांची समाजआरती करण्यात आली. सचिन आगलावे यांनी पौराहित्य केले. यावेळी भालचंद्र भुजबळ, संतोष भुजबळ, सुभाष दुर्गाडे, तुषार भुजबळ, प्रताप पवार, कैलास पवार, सचिन पवार, दीपक कुमठेकर, स्वप्निल सासवडे, डॉ. समीर पवार, स्वप्निल शहा, विनोद पवार, स्वप्निल पवार आदींसह ग्रामस्थ मोठ्या
संख्येने उपस्थित होते. देवस्थान ट्रस्टच्या मार्गदर्शनाखाली आगामी काळात शंभू महादेव मंदिर जीर्णोद्धार व भव्य प्रवेशद्वार उभारण्याचे कार्य राबविण्यात येणार असून, भाविकांनी या पवित्र कार्यात स्फूर्तीने सहभाग घेण्याचे आवाहन केले आहे. सायंकाळी वाल्हे गावचे माजी सरपंच अमोल खवले व मुंबईचे सेवानिवृत्त पोलिस अधिकारी संजय खवले यांच्या वतीने भाविकांसाठी महाप्रसादाचे आयोजन केले होते.
दरम्यान, वाल्हे येथील ग्रामदैवत श्री भैरवनाथांचे भव्य हेमाडपंती मंदिर श्रद्धेचे केंद्र बनले आहे. देवस्थान ट्रस्टचे अध्यक्ष संदेश शिर्के यांच्या नेतृत्वाखाली मंदिर परिसराच्या विकास व सुशोभीकरणाची कामे सुरू असून, परिसरात आकर्षक फुलझाडांची लागवड, तसेच पायाभूत
सुविधांसाठी पेव्हिंग ब्लॉक बसविण्यात आले आहेत.