वाल्हे, ता. २४ : सुकलवाडी (ता. पुरंदर) येथे आज नीरा-कोळविहिरे गटातील अभिमान प्रभाग संघाच्या महिलांची वार्षिक सर्वसाधारण सभा पार पडली. पुणे जिल्हा परिषद आणि उमेद महाराष्ट्र राज्य ग्रामीण जीवनोन्नती अभियान यांच्यातर्फे आयोजित या सभेत ग्रामीण महिलांचा मोठा सहभाग पाहायला मिळाला.
कार्यक्रमाचे उद्‍घाटन अभियान व्यवस्थापक नंदा कोरडे आणि तालुका व्यवस्थापक गणेश किकले यांच्या हस्ते करण्यात आले. गटाच्या वार्षिक कामकाज अहवालाच्या वाचनाने सभेची सुरुवात झाली. यावेळी गेल्या वर्षभरातील सामाजिक, आर्थिक, शैक्षणिक आणि आरोग्यविषयक उपक्रमांचा आढावा घेण्यात आला. तसेच, आगामी वर्षातील योजना ठरवल्या गेल्या. या प्रसंगी प्रभाग समन्वयक मोहम्मद शेतसंधी, रमेश भंडलकर, सागर ढाकणे, प्रभाग संघाच्या अध्यक्षा संगिता जगताप, सचिव शितल पवार यांसह नीरा-कोळविहिरे गटातील महिला उपस्थित होत्या.
अभियान व्यवस्थापक कोरडे यांनी महिलांना स्थानिक उपक्रमांमध्ये सक्रियपणे सहभागी होण्याचे आवाहन केले. तालुका व्यवस्थापक किकले व महंत घाडगे यांनी महिला नेतृत्व, आर्थिक सक्षमीकरण आणि गटाच्या कामात संघटनात्मक सहभाग याबाबत मार्गदर्शन केले. ग्रामसखी सीमा शिंदे, सुजाता शिंदे, सुजाता पवार आदींनी कार्यक्रमाचे संयोजन केले. सुनिता भादेकर यांनी प्रास्ताविक केले. रूपाली पवार व जयश्री कुंभार यांनी सूत्रसंचालन केले. तर, सरपंच संदेश पवार यांनी आभार मानले.