पुणे, ता. ६ ः रेल्वे स्टेशनवर प्रवाशांकडून कोरोना प्रतिबंधक नियमांचे कठोर पालन व्हावे, यासाठी रेल्वे प्रशासनाने तीव्र कारवाई सुरु करण्यास सुरवात केली आहे. गेल्या पाच दिवसांतच ४६ दोषी प्रवाशांवर कारवाई केली असून त्यांच्याकडून आठ हजार ७०० रुपयांचा दंड वसूल केला आहे.
कोरोना आणि ओमिक्रॉनच्या वाढणाऱ्या रुग्ण संख्येमुळे सरकारकडून सर्व नागरिकांना आवाहन केले आहे. मात्र गर्दीच्या ठिकाणी अद्यापही काळजी घेतली जात नसल्याचे चित्र आहे. रेल्वे स्थानकावर नियमांचे उल्लंघन केले जात असल्याकडे रेल्वे प्रशासनाचे लक्ष वेधण्यात आले होते. प्रवाशांनी रेल्वे स्थानकावर विनाकारण गर्दी करू नये, नियमांचे पालन करावे. या बाबत जनजागृती सुरु केली जात आहे. तसेच फलाटावर देखील गर्दी होऊ म्हणून रेल्वेने फलाट तिकिटाचे दर या पूर्वीच वाढविले आहेत. एप्रिल ते डिसेंबर या कालावधीत रेल्वे विनामास्क कारवाई करून ६ लाख ६० हजार रुपयांचे उत्पन्न मिळविले आहे, असे मध्य रेल्वेचे जनसंपर्क अधिकारी मनोज झंवर यांनी सांगितले.