पुणे, ता. ६ ः महाराष्ट्र मिलिटरी फाउंडेशनच्या वतीने ‘आझाद हिंद सेने’च्या प्रशिक्षणाची सुरुवात करण्यात आली आहे. यासाठी पुणे, सातारा, सोलापूर, कोल्हापूर या शहरांतील १०० ते १५० तरुण-तरुणींनी सहभाग घेतला. या वेळी कर्नल शशिकांत महाजन (निवृत्त) आणि ग्रुप कॅप्टन भालचंद्र लद्दे (निवृत्त) यांनी तरुणांना मार्गदर्शन केले. देशामध्ये जातीय तेढ निर्माण न करता एक भारतीय नागरिक म्हणून एकात्मतेच्या भावनेने देशाच्या आंतरिक सुरक्षेसाठी या प्रशिक्षणाचे महत्त्व असेल. त्यामुळे जास्तीत जास्त तरुणांनी या प्रशिक्षणात सहभाग घ्यावा, असे या वेळी महाजन यांनी सांगितले. संस्थेच्या वतीने लष्कर, पोलिस दलातील भरतीसाठी तरुणांना प्रशिक्षण देण्यात येते. या प्रशिक्षणामुळे आतापर्यंत सुमारे तीन हजार जण लष्करात व पोलिस दलात दाखल झाल्याचे संस्थेचे कार्याध्यक्ष प्रीतेश गुप्ते यांनी सांगितले. या प्रसंगी संस्थेचे प्रदीप साळुंखे, सचिन मुत्था, मिलिंद अंबिके, रुपेश जयस्वाल, विष्णू सोलकर आदी उपस्थित होते.