पुणे, ता. २६ : आरोग्य विभागाच्या ‘गट ड’च्या परीक्षेच्या पेपरसाठी एका एजंटने परीक्षार्थींना पुण्यातील शिरूर येथे एकत्र आणले असल्याची माहिती पोलिस तपासात समोर आली आहे.
गोपीचंद रामकृष्ण सानप (वय २८) असे या एजंटचे नाव आहे. सानप व त्याचा साथीदार नितीन सुधाकर जेऊरकर (४६) यांना अटक करून शनिवारी (ता. २६) न्यायालयात हजर करण्यात आले. न्यायालयाने त्यांना तीन मार्चपर्यंत पोलिस कोठडी सुनावली आहे. सानप हा प्रमुख एजंट आहे तर जेऊरकर हा सानपबरोबर मुलांना पेपर वाटण्याचे काम करत होता. ३१ ऑक्टोबर रोजी आरोग्य विभागाच्या परीक्षेसाठी पुणे जिल्ह्यातील शिरूर येथे २० परीक्षार्थींना घेऊन आल्याचे त्याने पोलिसांना सांगितले. प्रत्यक्षात त्याने आणखी काही लोकांना पेपर दिल्याचे समोर आले आहे. त्याला पेपर कोणी दिला, परीक्षार्थींकडून त्यांनी किती पैसे घेतले, यासंबंधीच्या तपासासाठी पोलिस कोठडी देण्याची मागणी सरकारी वकीलांनी केली. न्यायालयाने ती मान्य केली.