पुणे, ता. ४ : इंदिरा गांधी राष्ट्रीय मुक्त विद्यापीठाच्या सत्र परीक्षा शुक्रवारपासून (ता.४) सुरू झाल्या आहेत. पुणे विभागांतर्गत १६ परीक्षा केंद्रावर नियमित पद्धतीने परीक्षा पार पडत असल्याचे विभागीय संचालक डॉ. डी. आर. शर्मा यांनी सांगितले. परीक्षेसाठी अर्ज केलेल्या सहा लाख ७६ हजार ७९० पात्र विद्यार्थ्यांना प्रवेशपत्र संकेतस्थळावर उपलब्ध करून दिले आहेत. प्रवेशपत्र डाऊनलोड करून विद्यार्थी परीक्षेला बसू शकतात. परीक्षेदरम्यान विद्यार्थ्यांनी ओळखपत्र बाळगणे गरजेचे आहे. तसेच कोणतेही इलेक्ट्रॉनिक गॅझेट अथवा मोबाईल परीक्षा कक्षात नेता येणार नाही. कोरोनाच्या दृष्टीने आवश्यक सर्व नियमांचे पालन विद्यार्थ्यांनी करावे, असे आवाहन डॉ. शर्मा यांनी केले आहे.