पुणे, ता. २३ : दोन वर्षांच्या प्रतीक्षेनंतर बालगोपाळांचा ‘बालरंगमहोत्सव’ भेटीसाठी येत आहे. महाराष्ट्र कल्चर सेंटरच्या वतीने सात ते १५ मे या कालावधीत संस्थेच्या टिळक रस्त्यावरील ज्योत्स्ना भोळे सभागृहात आयोजन करण्यात येणार आहे. संध्याकाळी सहा ते सात या वेळात विविध गमती-जमती आणि ‘कट्टा परफॉर्मन्स’ झाल्यावर सात वाजता नाट्यप्रयोग सुरू होईल. मुलांशी निगडीत असलेल्या वेगवेगळ्या विषयांवरील नाटके या महोत्सवात मंचित केली जाणार आहेत. महोत्सवाची सुरुवात ‘आदींबाच्या बेटावर’ या रहस्ययपूर्ण नाटकाने होणार आहे. महोत्सवासाठी नाममात्र शुल्क आकारण्यात येणार असल्याचे सेंटरच्या वतीने सांगण्यात आले आहे.

महोत्सवात डॉ. अनिल अवचट यांच्या निवडक कथांचे कथाकथन, ‘ग्रिप्स’ची दोन नवी कोरी नाटके आहेत. त्यात ‘मिंग्लिश मीडियम, ‘आलं आमच्या लक्षात’ या नाटके तर ‘व्हेन रेनबो मीट्स अर्थ’ या नृत्यनाट्यकृती महोत्सवाचे आकर्षण असणार आहेत.