दौंड, ता. ८ : सोनवडी (ता. दौंड) येथे चुलत आजोबांनी निष्काळजीपणे ट्रॅक्टर मागे घेतल्याने झालेल्या अपघातात दोन वर्षीय चिमुरड्याचा ट्रॉलीखाली चिरडून मृत्यू झाला. याप्रकरणी दौंड पोलिसांनी शुक्रवारी (ता. ८) गुन्हा दाखल केल्याची माहिती दिली आहे.
सोनवडी येथे गुरुवारी (ता. ७) दुपारी चारच्या सुमारास ही हृदयद्रावक घटना घडली. अब्दुल गुड्डूभाई सय्यद (वय ५०, रा. सोनवडी) हे त्यांच्या घरासमोरील पटांगणात ट्रॅक्टरला जोडलेली डंपिंग ट्रॉली मागे घेत होते. यावेळी ट्रॉलीच्या मागे असलेल्या उमर अल्लाउद्दीन सय्यद (वय २) याच्याकडे दुर्लक्ष झाल्याने ट्रॉलीचे चाक त्याच्या अंगावरून गेले आणि त्याचा जागीच मृत्यू झाला. याप्रकरणी उमरचे वडील अल्लाउद्दीन कासम सय्यद यांनी दौंड पोलिस ठाण्यात फिर्याद दिली आहे. त्यानुसार अब्दुल सय्यद यांच्याविरुद्ध निष्काळजीपणामुळे मृत्यूस कारणीभूत ठरल्याप्रकरणी गुन्हा दाखल करण्यात आला आहे.