सासवड शहर, ता. ३ : सोनोरी (ता. पुरंदर) येथे बैलपोळ्यानिमित्त काढण्यात आलेल्या मिरवणुकीदरम्यान एका प्रौढाचा मृत्यू झाला. पूर्वपरवानगी न घेता लावण्यात आलेल्या साऊंड सिस्टीमच्या भिंतीचा वरचा भाग चिंचेच्या झाडाच्या फांदीला धडकला. त्यामुळे साऊंड बॉक्स डोक्यात पडून गंभीर जखमी झालेल्या प्रौढाचा मृत्यू झाला. रवींद्र चंद्रकांत रणदीर (वय ४५, रा. वरवंड) असे मृताचे नाव आहे. ते साऊंड सिस्टिमचे सहाय्यक होते. साऊंड सिस्टीम लावण्यात आलेल्या गाडीच्या बरोबर ते चालत होते. या प्रकरणी बैलमालक सौरभ पंढरीनाथ काळे, बाळासाहेब नाना काळे, साऊंड सिस्टिम मालक अभिजित बुवा दिवेकर, लखन युवराज घोडके (सर्व रा. वरवंड) यांच्यावर सासवड पोलिस ठाण्याचे पोलिस हवालदार जब्बार हारुण सय्यद यांनी फिर्याद दाखल केली. पोलिस निरीक्षक ऋषिकेश अधिकारी अधिक तपास करीत आहेत.
-----