पुणे, ता. १० ः गेली पाच दशके अविरतपणे रंगभूमीची सेवा करणारे, ‘रंगभूषाकार’ नव्हे तर ‘रंगभाषाकार’ हे बिरूद सार्थ करणारे आणि नाट्यकर्मींचे लाडके ‘भावेकाका’ ज्येष्ठ रंगभूषाकर प्रभाकर नीलकंठ भावे (वय ७८) यांचे मंगळवारी पहाटे पुण्यात राहत्या घरी निधन झाले. त्यांच्या पश्चात दोन मुली, जावई आणि नातवंडे असा परिवार आहे. त्यांच्या पार्थिवावर वैकुंठ स्मशानभूमीत अंत्यसंस्कार करण्यात आले.

भावे यांची रंगभूषाकार म्हणून सुमारे ५५ वर्षांची कारकीर्द होती. मूळचे साताऱ्याचे असलेल्या भावेंना लहानपणापासून नाटक, संगीत, साहित्य आदींची आवड होती. परंतु, साताऱ्यामध्ये त्यांच्या कलेला पुरेसा वाव नसल्याने ते पुण्यात आले आणि इथेच रमले. महाराष्ट्रातील सर्व नावाजलेल्या नाट्य स्पर्धांशी ते रंगभूषाकार म्हणून संबंधित होते. मुखवटे तयार करण्यात त्यांचा हातखंडा होता. अनेक वर्षे पुरुषोत्तम स्पर्धेत सहभागी होणाऱ्या स्पर्धकांची रंगभूषा भावे नियमितपणे करत असत. त्यांनी लिहिलेले ‘रंगभूषा’ नावाचे पुस्तक पु. ल. देशपांडे यांच्या हस्ते प्रकाशित करण्यात आले होते. या पुस्तकाला राज्य सरकारचा तत्कालीन वर्षाचा उत्तम साहित्यकृतीचा पुरस्कार मिळाला होता. चांगला रंगभूषाकार होण्यासाठी चित्रकला आणि शिल्पकलेचे ज्ञान आवश्‍यक आहे. तसेच वाचनाची गोडीही हवी. त्याशिवाय, रंगांच्या माध्यमातून व्यक्तिरेखा उभी करता येत नाही. पण व्यक्तिरेखेनुसार योग्य रंगभूषा करता आली तर कलाकार खुलतो. त्याचा परिणाम अभिनयावर होतो. म्हणून मला रंगभूषा हा नटाला खुलवणारा मानसोपचारच वाटतो, या भूमिकेतून भावे यांनी या क्षेत्राकडे पाहिले.