पुणे, ता. ८ : पुर्वीच्या काळी शालेय जीवनातच विविध झाडे आणि त्यांच्या बियांची ओळख व्हायची. सध्या शालेय विद्यार्थ्यांना बिया माहित नाहीत. त्यामुळे शिक्षकांनी आपापल्या वर्गातील विद्यार्थ्यांना वर्षाला किमान ५० बियांची माहिती करून द्यावी आणि प्रत्येक शिक्षकाने किमान आपापल्या वयाइतकी झाडे लावावीत, असे आवाहन प्रसिद्ध अभिनेते सयाजी शिंदे यांनी बुधवारी केली. पुणे जिल्हा परिषद आणि पुणे जिल्हा शिक्षण व प्रशिक्षण संस्थेच्यावतीने आयोजित यशवंतराव चव्हाण जिल्हास्तरीय आंतरशालेय नाट्य स्पर्धेचे बक्षीस वितरण आज सयाजी शिंदे यांच्या हस्ते झाले. या वेळी ते बोलत होते.

प्रत्येक विद्यार्थ्यांने शालेय जीवनात एक तरी झाड लावावे आणि दहावीपर्यंत ते झाड जपण्याची जबाबदारी स्विकारावी, असा सल्ला शिंदे यांनी या वेळी विद्यार्थ्यांना या वेळी दिला. या वेळी जिल्हा परिषदेचे मुख्य कार्यकारी अधिकारी आयुष प्रसाद, जिल्हा शिक्षणाधिकारी (प्राथमिक) संध्या गायकवाड, जिल्हा शिक्षण व प्रशिक्षण संस्थेच्या प्राचार्य डॉ. शोभा खंदारे, नाट्यस्पर्धेचे कार्याध्यक्ष हनुमंत कुबडे, प्रा. महेश शेंडकर, प्रभाकर क्षीरसागर, आदी उपस्थित होते.

शिंदे पुढे म्हणाले, ‘‘झाडे आपल्याला खूप ऑक्सिजन देतात. आपल्या जीवनात आई, शिक्षक आणि झाड या अत्यंत महत्त्वाच्या गोष्टी आहेत. शालेय विद्यार्थी शाळेत जर पर्यावरणाविषयी काम करत असतील तर, झाडे लावत असतील, अशा विद्यार्थ्यांना ‘वृक्ष सुंदरी’, ‘वृक्षराज’ यासारखे पुरस्कार द्यावेत. शालेय विद्यार्थ्यांना बिया, झाडे-झुडपे, गवते याची माहिती द्यावी व त्याविषयी जाणीव जागृती निर्माण करावी.’’ संतोष देशमुख व गीता पाटील यांनी कार्यक्रमाचे सूत्रसंचालन केले.

पिंपरीतील शाळेला जनरल चॅम्पियनशीप
यशवंतराव चव्हाण शालेय नाट्य स्पर्धेची जनरल चॅम्पियनशिप पिंपरी चिंचवड शहरातील हिंदुस्तान अँटिबायोटिक हायस्कूल या शाळेला प्रदान करण्यात आली. आंतरशालेय नाट्य स्पर्धेमध्ये सांघिक, दिग्दर्शन, नाट्यलेखन, नेपथ्य, आदी विविध गटांत पारितोषिके देण्यात आली. या वेळी प्राथमिक व माध्यमिक स्तरावरील जिल्हास्तरावरील प्रथम, द्वितीय व तृतीय क्रमांकाच्या पारितोषिकांचे वितरण करण्यात आले.