पुणे, ता. ३ : ‘‘पंतप्रधान नरेंद्र मोदी हे लोकांना कायम ‘मन की बात’ सांगतात, पण त्यांनी आता ‘जन की बात’ ऐकण्याची तयारी ठेवावी. पंतप्रधान घरोघरी तिरंगा लावण्याचे आवाहन करतात, त्यापुढे जाऊन आता पंतप्रधानांनी ‘घरोघरी तिरंगा, घरोघरी संविधान’ हे सांगण्याची गरज आहे,’’ अशा कडक शब्दात कष्टकरी व कामगारांचे नेते डॉ. बाबा आढाव यांनी शुक्रवारी (ता. ३) पंतप्रधान नरेंद्र मोदी यांच्यावर टीका केली.
विविध राजकीय पक्ष व सामाजिक संघटनांच्यावतीने टिळक स्मारक येथे ‘महाराष्ट्र सन्मान परिषदे’च्या पहिल्या कार्यक्रमाचे आयोजन केले होते. त्यावेळी आढाव बोलत होते. याप्रसंगी राष्ट्रवादी काँग्रेसचे नेते जितेंद्र आव्हाड, शिवसेना उद्धव बाळासाहेब ठाकरे गटाच्या उपनेत्या सुषमा अंधारे, शाहीर संभाजी भगत आदी मान्यवर उपस्थित होते.
निकालाचा आढावा घेताना डॉ.आढाव म्हणाले, ‘‘लोक भूमिका घेतात, राजकारण्यांपेक्षाही जनता दोन पावले पुढे असते, हे शिक्षक व पदवीधर निवडणुकांच्या निकालांवरून स्पष्ट झाले आहे. ते भ्रमामध्ये आहेत, जनतेला बदलायचे आहे हे दिसू लागले. एकीकडे अदानींचे जगात मार्केट वाढतेय, तर दुसरीकडे देशाचा क्रमांक घसरत आहे. स्वातंत्र्य, समता, बंधुता या मुल्यांशी आमची बांधिलकी आहे. छत्रपती शिवाजी महाराजांनी आम्हाला तलवार दिली, महात्मा फुले-सावित्रीबाई फुले यांनी पाटी-पेन्सील दिली, तर डॉ. बाबासाहेब आंबेडकर यांनी मतदानाचा अधिकार दिला. ही वाटचाल रोखण्याचे काम सध्या सुरु आहे, आता भ्रमात राहू नका, ‘महाराष्ट्र सन्मान परिषदे’च्या माध्यमातून एकजुटीने लढा द्या.’’
अंधारे म्हणाल्या, ‘‘छत्रपती शिवाजी महाराज, महात्मा फुले, शाहू महाराज, डॉ.बाबासाहेब आंबेडकर या महापुरुषांच्या प्रतिमांना डॅमेज करण्याचे काम नियोजितपणे केले जात आहे. महापुरुषांच्या प्रतिमांना मोडीत काढून ते हेडगेवार, गोळवलकर यांना पुढे आणण्याचा प्रयत्न करीत आहेत. मोहन भागवत संप्रदायाचे हे मनसुबे उधळवून लावण्याचे काम महाराष्ट्र सन्मान परिषदेच्या माध्यमातून केले जाणार आहे. याच पद्धतीने त्यांनी महाविकास आघाडीचे सरकार पाडले. शिवाजी महाराजांविषयी भगतसिंग कोश्यारी वादग्रस्त बोलूनही मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी त्यांच्याविरुद्ध ठराव मांडण्याचा किंवा त्यांच्याबाबत केंद्राला पत्र पाठविण्याचे धाडस दाखविले नाही.’’
यावेळी जितेंद्र आव्हाड, महेश शिंदे, यांनी आपले मनोगत व्यक्त केले. कार्यक्रमाचे प्रास्ताविक प्रशांत जगताप यांनी केले, तर सूत्रसंचालन राष्ट्रवादी काँग्रेसचे प्रवक्ते प्रदीप देशमुख यांनी केले.