पुणे, ता. १५ ः प्रतिभावंत साहित्यिक जी. ए. कुलकर्णी यांच्या जन्मशताब्दीनिमित्त त्यांचे कुटुंबीय, महाराष्ट्र साहित्य परिषद, पुणे आणि अक्षरधारा बुक गॅलरीतर्फे रविवारी (ता. १९) सायंकाळी ५ वाजता हिराबाग येथील ज्योत्स्ना भोळे सभागृहात वाङ्मयीन उपक्रमाचे आयोजन करण्यात आले आहे.

या कार्यक्रमाला प्रमुख पाहुणे म्हणून ज्येष्ठ साहित्यिक ल. म. कडू उपस्थित राहणार आहेत. यानिमित्त ‘जीएंचे लेखन ः कला आणि कुसर’ याविषयी डॉ. संजीव कुलकर्णी भाष्य करणार आहेत, तर जीएंच्या निवडक पत्रांचे वाचन अभिरुची ज्ञाते करणार आहेत, तसेच महाराष्ट्र कल्चरल सेंटरतर्फे जीएंच्या ‘प्रदक्षिणा’ या कथेवर आधारित ‘अनुदिन अनुतापे’ हे नाट्यरूपांतर सादर केले जाणार आहे. त्याचे दिग्दर्शन आणि संगीत प्रमोद काळे यांचे असून, शुभांगी दामले, चंद्रशेखर कुलकर्णी, मिलिंद कुलकर्णी, ऋत्विज कुलकर्णी आणि केतकी फडके हे कलाकार विविध भूमिका साकारत आहेत.
--------------