पुणे, ता. २७ ः कणखरपणाबरोबरच कनवाळूपणा जपणारे शंकरराव चव्हाण तळागाळातील लोकांसाठी झटणारे पण प्रसिद्धीपासून अलिप्त राहणारे नेते होते, असे प्रतिपादन ज्येष्ठ पत्रकार निशिकांत भालेराव यांनी नुकेतच केले.
मराठवाडा मित्रमंडळातर्फे शंकरराव चव्हाण यांच्या १९व्या स्मृतिदिनानिमित्त आयोजित कार्यक्रमात ते बोलत होते. याप्रसंगी ज्येष्ठ पत्रकार मुकुंद संगोराम, संस्थेचे कार्याध्यक्ष प्राचार्य भाऊसाहेब जाधव, शंकरराव चव्हाण विधी महाविद्यालयाच्या प्राचार्य डॉ. क्रांती देशमुख आणि संस्थेचे कार्यकारिणी सदस्य तेज निवळीकर उपस्थित होते. ‘‘समाजकारणासाठी राजकारणाचा वैधानिक उपयोग कसा करून घेता येईल, याचा उत्तम नमुना शंकररावांनी आपल्यासमोर ठेवला आहे. सध्याच्या राजकारणाचा पोत बदलला आहे. त्यात समाजहितापेक्षा स्वलाभाला महत्त्व मिळत आहे’’, असे भालेराव यांनी सांगितले. ‘‘शंकररावांनी अभ्यासपूर्ण, समस्येवर उत्तर शोधणारे समाजहितैषी राजकारण केले’’, असे मत संगोराम यांनी व्यक्त केले. प्राचार्य जाधव यांनी शंकरराव चव्हाण यांच्याविषयीच्या आठवणींना उजाळा दिला.