पुणे, ता. २८ ः आगामी लोकसभा निवडणुका अवघ्या काही महिन्यांवर येऊन ठेपलेल्या असताना केंद्र सरकारकडून त्यांनी गेल्या पाच वर्षात राबविलेल्या योजनांच्या प्रचारासाठी कंबर कसली आहे. २८ नोव्हेंबर ते २६ जानेवारी या कालावधीत यासाठी ‘विकसित भारत संकल्प यात्रा’ काढली जाणार आहे. केंद्र सरकारने यासाठी मोबाईल थिएटर व्हॅन उपलब्ध करून दिली असून, दोन महिन्यांत ही व्हॅन १२५ ठिकाणी योजनांचा प्रचार व प्रसार करणार आहे.

केंद्र सरकारतर्फे विकसित भारत संकल्प यात्रा अभियान राबविण्यात येत आहे. या यात्रेअंतर्गत केंद्र सरकारच्या योजना सर्वसामान्यपर्यंत पोचविणे, त्याची जनजागृती, प्रसार, नवीन लाभार्थी नोंदणी तसेच लाभार्थ्यांशी संवाद साधला जाणार आहे. यातून पीएम स्वनिधी शिबिर, आयुष्यमान योजना शिबिर, आरोग्य शिबिर, आधार अद्ययावतीकरण शिबिर, प्रधानमंत्री उज्वला गॅस शिबिराचे आयोजन केले जाणार आहे.

असा आहे उद्देश
या यात्रेच्या माध्यमातून ज्या नागरिकांपर्यंत योजना पोचल्या नाहीत, त्यांना योजनेचा लाभ देणे, माहितीचा प्रसार व प्रचार करणे, योजनांबाबत जनजागृती करणे, नागरिकांशी संवाद साधणे, नवीन लाभार्थी नोंदणी करणे, हा या यात्रेचा उद्देश आहे, अशी माहिती समाजविकास विभागाचे उपायुक्त नितीन उदास यांनी दिली.