पुणे, ता. ३० : तरुण मुले नियमांचे उल्लंघन करीत बेदरकारपणे वाहने चालवितात, त्यांच्यामुळे दुसऱ्यांच्या जिवाला धोका आहे. विरुद्ध दिशेने वाहन चालविणे, विनाकारण हॉर्न वाजविण्याचेही प्रकार सुरू आहेत. त्यांच्यावरही पोलिसांनी कडक कारवाई करावी, पोलिसांनी दंडात्मक कारवाईपेक्षा वाहनचालकांना शिस्त लावण्यास प्राधान्य द्यावे, असे सांगत नागरिकांनी बेशिस्त वाहनचालकांवर आसूड ओढला.

पुणे शहर वाहतूक पोलिसांकडून बेशिस्त वाहनचालकांना शिस्त लावण्यासाठी ‘कोणे हा माठ’ ही मोहीम राबविली जात आहे. त्याबाबत काही नागरिकांनी ‘सकाळ’कडे आपल्या प्रतिक्रिया नोंदविल्या आहेत. तर काहींनी पुणे शहर वाहतूक पोलिसांच्या ट्विटरवर प्रतिक्रिया दिल्या आहेत. प्रतिक्रिया देणाऱ्या नागरिकांनी बेशिस्त वाहनचालकांवर कारवाई करण्याची मागणी पोलिसांकडे केली आहे, त्याचबरोबर नियमांचे उल्लंघन करणाऱ्यांकडे दुर्लक्ष करणाऱ्या वाहतूक पोलिसांनाही धारेवर धरले आहे.

नागरिक म्हणतात...
‘कोणे हा माठ’ च्या माध्यमातून वाहतुकीच्या नियमांबाबत जागृत केले जात आहे. बेशिस्त वाहनचालकांचे प्रमाण वाढत आहे. अल्पवयीन मुले नियामांचे उल्लंघन करीत भरधाव वाहने चालवित नागरिकांच्या जिवाला धोका निर्माण करीत आहेत. वाहतूक पोलिसांनी केवळ बघ्याची भूमिका न घेता कायद्याचा बडगा उगारला पाहिजे.
- अजित भंडारी

या उपक्रमात वाहनाद्वारे प्रवास करताना नियम तोडणाऱ्यांच्या डोक्‍यावर माठ दाखविला आहे, त्याच पद्धतीने चौकापुढे उभे राहून नागरिकांची वाहने अडवून त्यांच्या पावत्या फाडणाऱ्या वाहतूक पोलिसांच्या डोक्‍यावरही माठ दाखवा. वाहतूक नियमनापेक्षा हेल्मेट कारवाईवर त्यांचे जास्त लक्ष असते. चौकात कोंडी असताना, पोलिस मोबाईल बघत बसलेले असतात. मग ते माठ नाहीत का?
- नीता नाटेकर

शनी मंदिर रस्त्यावरील एका शाळेच्या बस दररोज सकाळी रस्त्याच्या दुतर्फा लावलेल्या असतात. त्यांच्या पार्किंग करण्याच्या चुकीच्या पद्धतीमुळे वाहनचालकांवर विरुद्ध दिशेने वाहन चालविण्याची वेळ येत आहे.
- नितीन जोशी

बाजीराव रस्त्यावरील महाराणा प्रताप बागेजवळ ‘नो एंट्री’चा फलक असतानाही वाहनचालक अचानक कुठूनही एकतर्फी मार्ग असणाऱ्या रस्त्यावर गाड्या घालतात. इथे एकतर सिग्नल बसवा किंवा वाहतूक पोलिस ठेवा. सतत अपघात होऊनही त्याकडे दुर्लक्ष केले जात आहे.
- संकेत चव्हाण