पुणे, ता. १६ : संयुक्त राष्ट्राच्या वतीने ७ युएन रस्ता सुरक्षा सप्ताहाचे आयोजन करण्यात आले आहे. सोमवार (ता. १५) ते रविवार (ता. २१) दरम्यान हा सप्ताह साजरा होणार आहे. २०३० पर्यंत रस्ते अपघातांची संख्या निम्म्यावर आणण्याचे उद्दिष्ट ठरविण्यात आले असून यासाठी चालणे, सायकलिंग, सार्वजनिक वाहतूक व्यवस्था ही यंदाची थीम आहे. रस्ते सुरक्षा बाबत नागरिकांचे प्रबोधन व्हावे, या करिता आरटीओ प्रशासनाने या सप्ताहात विविध कार्यक्रमांचे आयोजन केले आहे.
या सप्ताहाचे उद्‌घाटन सोमवारी सकाळी १० वाजता सिंहगड कॉलेज येथे झाले. याप्रसंगी सिंहगड कॉलेजचे प्राचार्य एस. डी. लोखंडे व उपप्राचार्य वाय. पी. रेड्डी, सहाय्यक प्रादेशिक परिवहन अधिकारी युवराज पाटील, मोटार वाहन निरीक्षक शाहीद जमादार, दिनेश पाटील, ऋषिकेश कोरडे, दीपा ताम्हणे, राजकुमार नरसंगोडे तसेच विद्यार्थी उपस्थित होते.
यावेळी युवराज पाटील यांनी उपस्थित विद्यार्थ्यांना रस्ता सुरक्षेचे धडे दिले. तसेच प्रामुख्याने हेल्मेट विषयी प्रबोधन केले. वाहन चालविताना गती पेक्षा सुरक्षेला प्राधान्य देणे आवश्यक असल्याचे त्यांनी सांगितले. तसेच विद्यार्थ्यांनी सायकल चालवून सायकल डे साजरा करण्याचे आवाहन पाटील यांनी केले.