‘हरी नरके स्मृतिवाचक पुरस्कार’
नितीन वैद्य यांना जाहीर

पुणे, ता. ६ ः राजहंस पुस्तक पेठेतर्फे विचारवंत, संशोधक, लेखक प्रा. हरी नरके यांच्या स्मृतिप्रित्यर्थ या वर्षीपासून ‘हरी नरके स्मृतिवाचक पुरस्कार’ सुरू करण्यात येत आहे. हा पहिला पुरस्कार यंदा सोलापूर येथील ज्येष्ठ वाचक नितीन वैद्य यांना जाहीर झाला आहे, अशी माहिती राजहंस पुस्तक पेठेचे संचालक संजय जोशी यांनी दिली. हा पुरस्कार शनिवारी (ता. ९) सायंकाळी ५.३० वाजता पौड रस्त्यावरील ब्रह्मे सभागृहात होणाऱ्या कार्यक्रमात हरी नरके यांची कन्या व अभिनेत्री प्रमिती नरके यांच्या हस्ते व प्रसिद्ध अभिनेते गिरीश कुलकर्णी यांच्या उपस्थितीत प्रदान केला जाईल. मराठीतील एका उत्तम वाचकाला दरवर्षी ९ सप्टेंबरला हा पुरस्कार दिला जाईल, तसेच येत्या ऑक्टोबर महिन्यात एका नवोदित वाचकाला ‘हरी नरके वाचन शिष्यवृत्ती’ देण्यात येणार आहे. दहा हजार रुपये किमतीचे ग्रंथ आणि सन्मानपत्र, असे या पुरस्कार आणि शिष्यवृत्तीचे स्वरूप असेल.
----
सुमेध वडावाला (रिसबूड) यांना स्नेहांजली पुरस्कार जाहीर
पुणे, ता. ६ ः प्रकाशिका अंजली घाटपांडे यांच्या स्मृतिप्रितर्थ स्नेहल प्रकाशनातर्फे देण्यात येणारा ‘स्नेहांजली पुरस्कार’ यंदा प्रसिद्ध लेखक सुमेध वडावाला (रिसबूड) यांना जाहीर झाला आहे. या पुरस्काराचे हे २१ वे वर्ष आहे. १ ऑक्टोबरला सायंकाळी ६ वाजता नवी पेठेतील एस. एम. जोशी सभागृहात होणाऱ्या कार्यक्रमात मूर्तिशास्त्राचे ज्येष्ठ अभ्यासक डॉ. गो. बं. देगलूरकर यांच्या हस्ते हा पुरस्कार प्रदान करण्यात येणार आहे. यावेळी डॉ. मुकुंद दातार लिखित ‘दशोपनिषदांतील गीताधर्म’, विद्याधर ताठे लिखित ‘संत जनाबाईंची अभंगगाथा’ आणि आशुतोष बापट लिखित ‘सफर छत्तीसगडची’ या तीन पुस्तकांचे प्रकाशन होणार आहे.
----
रामदास फुटाणे लिखित पुस्तकाचे रविवारी प्रकाशन
पुणे, ता. ६ ः ज्येष्ठ वात्रटिकाकार रामदास फुटाणे लिखित ‘वर्षा, ईर्ष्या आणि गोहत्ती’ या पुस्तकाचे प्रकाशन रविवारी (ता. १०) सायंकाळी ५.३० वाजता नवी पेठेतील एस. एम. जोशी सभागृहात आयोजित कार्यक्रमात ज्येष्ठ अभिनेते डॉ. मोहन आगाशे यांच्या हस्ते होणार आहे. कोल्हापूरचे ज्येष्ठ समीक्षक प्रा. डॉ. रणधीर शिंदे कार्यक्रमाचे अध्यक्षस्थान भूषविणार आहेत, अशी माहिती प्रकाशक इंद्रजित घुले यांनी दिली. यावेळी उपहास, व्यंग्य आणि विडंबनातून वर्तमान राजकारण आणि समाजकारणावर स्तंभलेखनातून भाष्य करणारे प्रवीण टोकेकर (ब्रिटिश नंदी), श्रीकांत बोजेवार (तंबी दुराई) आणि रामदास फुटाणे यांच्याशी महाराष्ट्र साहित्य परिषदेचे कार्याध्यक्ष प्रा. मिलिंद जोशी मुक्त संवाद साधणार आहेत.
----
सुनील गोडबोले यांना प्रकाश इनामदार स्मृती पुरस्कार
पुणे ः विजय पटवर्धन फाउंडेशनतर्फे देण्यात येणारा ‘विनोदमूर्ती प्रकाश इनामदार स्मृती पुरस्कार’ यंदा ज्येष्ठ अभिनेते सुनील गोडबोले यांना जाहीर झाल्याची माहिती फाउंडेशनचे अध्यक्ष विजय पटवर्धन यांनी दिली. पुरस्काराचे हे पहिलेच वर्ष आहे. या पुरस्काराचे वितरण विनोदमूर्ती प्रकाश इनामदार स्मृती राज्यस्तरीय एकांकिका स्पर्धेच्या पारितोषिक वितरण सोहळ्यात करण्यात येईल. हा सोहळा शुक्रवारी (ता. ८) सायंकाळी ६ वाजता भरत नाट्य मंदिर येथे होणार आहे. याप्रसंगी लेखक-दिग्दर्शक योगेश सोमण, अखिल भारतीय मराठी नाट्य परिषदेच्या पुणे शाखेचे अध्यक्ष मेघराजराजे भोसले, नाट्य परिषदेच्या मध्यवर्ती शाखेचे उपाध्यक्ष भाऊसाहेब भोईर, ज्येष्ठ अभिनेत्री जयमाला इनामदार उपस्थिती असतील.
----
डॉ. नीलेश साबळे यांना समाजभूषण पुरस्कार जाहीर
पुणे ः दादा कोंडके मेमोरिअल फाउंडेशनतर्फे दादा कोंडके यांच्या ९५ व्या जयंतीनिमित्त देण्यात येणारा ‘दादा कोंडके समाजभूषण पुरस्कार’ यंदा प्रसिद्ध लेखक, दिग्दर्शक व अभिनेते डॉ. नीलेश साबळे यांना जाहीर झाला आहे. फाउंडेशनचे प्रमुख विश्वस्त मनोहर कोलते यांनी ही माहिती दिली. शनिवारी (ता. ९) सायंकाळी ५.१५ वाजता टिळक रस्त्यावरील महाराष्ट्र साहित्य परिषदेच्या माधवराव पटवर्धन सभागृहात होणाऱ्या कार्यक्रमात हा पुरस्कार प्रदान करण्यात येईल. याप्रसंगी आंतरराष्ट्रीय मानवाधिकार संरक्षण ब्युरोचे राष्ट्रीय अध्यक्ष चंद्रकांत खडके यांनाही ‘दादा कोंडके स्मृती विशेष सन्मान’ प्रदान करण्यात येणार आहे.
----