पुणे, ता. १७ ः लडाख भागातील सतरा हजार फूट उंचीवरील रेझांगलाची खिंड... तापमान शून्य अंश सेल्सियसपेक्षाही कमी... समोर हजारोंच्या संख्येतील चिनी सैनिक... अशा प्रतिकूल परिस्थितीतही धैर्याने उभी राहिली भारतीय लष्कराची १३ कुमाऊ रेजिमेंटची मेजर शैतान सिंह यांच्या नेतृत्वाखाली चार्ली कंपनी ही १२० सैनिकांची तुकडी. त्यांनी तब्बल १३०० हून अधिक चिनी सैनिकांना यमसदनी पाठवत अतुलनीय शौर्य गाजवले. ही अपूर्व समरगाथा पुणेकरांसमोर रविवारी उलगडली.

निमित्त होते, भारत-चीनमधील १९६२ च्या युद्धाला ६२ वर्षे पूर्ण होत असल्याबद्दल असीम फाउंडेशनतर्फे आणि जागर संस्थेच्या सहकार्याने आयोजित विशेष कार्यक्रमाचे. या लढाईत प्रत्यक्ष सहभागी झालेले ब्रिगेडियर आर. व्ही. जठार (निवृत्त) यांच्या अनुभव कथनातून आणि जागर संस्थेच्या कलाकारांनी सादर केलेल्या नाट्य अभिवाचनातून या लढाईची शौर्यगाथा समोर आली. भारावून टाकणाऱ्या या अनुभवकथनानंतर उपस्थितांनी उभे राहून टाळ्यांच्या कडकडाटात सैनिकांच्या अतुलनीय शौर्याला वंदन केले.

याप्रसंगी असीम फाउंडेशनचे अध्यक्ष सारंग गोसावी, फाउंडेशनचे सल्लागार आणि लेफ्टनंट जनरल सुदर्शन हसबनीस (निवृत्त), लेफ्टनंट जनरल विनायक पाटणकर (निवृत्त) आदी उपस्थित होते. सुरुवातीला सारंग गोसावी आणि सुदर्शन हसबनीस यांनी भारत-चीन युद्धाची पार्श्वभूमी विशद केली. त्यानंतर जागर संस्थेचे कलाकार अमित वझे, गजानन परांजपे, अक्षय वाटवे आदींनी नाट्य अभिवाचनातून या लढाईची कहाणी सादर केली.

ब्रिगेडियर जठार (निवृत्त) म्हणाले, ‘‘ही लढाई खरोखर अतुलनीय शौर्याचे जिवंत उदाहरण आहे. कोणत्याही लढाईत तुकडीचा प्रमुख अधिकारी शेवटपर्यंत आपल्यासोबत राहिला, तर सैनिकांनाही लढण्याचे बळ येते. तेच या लढाईबाबत झाले. आजघडीला चीन आपल्यापेक्षा सशक्त आहे, पण आपणही कमकुवत नाही. आपणही दिवसेंदिवस शक्तिशाली होत आहोत. कमी शक्तिशाली देशांनी त्यांच्यापेक्षा बलाढ्य देशांना हरवल्याची उदाहरणे आहेतच. त्यामुळेच आजच्या परिस्थितीत कोणत्याही क्षणी चीनचा सामना करण्यासाठी आपण सक्षम आहोत.’’ संस्कृती बापट यांनी सूत्रसंचालन केले.