मयूर कॅालनी, ता. २४ : प्रसिद्ध गायक दिलजीत दोसांझचा गाण्यांचा कार्यक्रम कोथरूडमधील शिवतीर्थनगर भागात आज (ता. २४) सायंकाळी गाण्यांचा कार्यक्रम आयोजित करण्यात आला होता. मात्र परिसरातील रहिवासी क्षेत्राला होणारा त्रास पाहता रहिवाशांनी या कार्यक्रमाला विरोध दर्शविला. विरोधाचे जागोजागी फलक लावण्यात आले.
गायक दिलजीत दोसांझ याला किंवा त्याच्या गायनाला विरोध नसून, कार्यक्रमात होणारे मद्यपान आणि कर्कश्य आवाजाला आमचा विरोध आहे. राज्य उत्पादन शुल्क पुणे विभागाचे अधीक्षक चरणसिंह राजपूत यांनी कार्यक्रमात मद्यविक्रीला कोणतीही परवानगी दिलेली नाही. कार्यक्रमाच्या मागील बाजूस वनपरिक्षेत्र आहे, तर समोरील बाजूस शिक्षकनगर, कांचनबन, साम्राज्य, स्वरांजली, सीमा गार्डन, शुभतेज, हिमालय अशा अनेक मोठ्या सोसायट्या आहेत. रस्ते अरुंद असल्याने वाहनांची मोठ्या प्रमाणात वर्दळ होणार आहे, यामुळे विरोध केला असल्याचे रहिवाशांनी सांगितले. कार्यक्रमाच्या आयोजनातील आर्यन नवले यांना भ्रमणध्वनीद्वारे संपर्क केला असता त्यांनी प्रतिसाद दिला नाही.

या कार्यक्रमाला माझा स्थानिक आमदार म्हणून तसेच एक नागरिक म्हणून विरोध आहे. फक्त मद्यपान आणि विक्रीसाठी विरोध नाही, तर या कार्यक्रमामुळे होणारी वाहतूक कोंडी आणि कर्णकर्कश आवाजालासुद्धा माझा विरोध आहे. कार्यक्रम रद्द करा, अशा सूचना मी पोलिस आयुक्त, उत्पादन शुल्क विभाग आणि जिल्हाधिकारी यांना दिल्या आहेत. असे कार्यक्रम समाजाला लागलेली किड आहे. हा कार्यक्रम झाला तर भाजपच्या वतीने मोर्चा काढण्यात येईल आणि या मोर्चाचे नेतृत्व मी स्वतः करेन.
- चंद्रकांत पाटील, आमदार

भजप, मनसे, आपचा विरोध
भाजपचे कोथरूड विधानसभा अध्यक्ष संदीप बुटाला, शहर उपाध्यक्ष मंदार बलकवडे व इतर पदाधिकाऱ्यांनी कोथरूड पोलिस ठाण्यात निवेदन देऊन कार्यक्रमााला विरोध दर्शवला. मनसे विद्यार्थी सेनेचे अमोल शिंदे तसेच आम आदमी पक्षाचे अमोल काळे यांनीआंदोलन करून विरोध दर्शविला. सकल मातंग समाज कोथरूडचे अध्यक्ष विजय डाकले यांनीदेखील पोलिस ठाण्यात पत्र देऊन कार्यक्रम बंद पाडू, असा इशारा दिला.