पुणे, ता. ३ ः जीएसबी संयुक्त कोकणी सभेतर्फे शारदोत्सवाचे आयोजन करण्यात आले आहे. यात धार्मिक, सामाजिक, सांस्कृतिक तसेच आरोग्यविषयक उपक्रम राबविले जाणार आहेत. महोत्सवातील सांस्कृतिक उपक्रमांमध्ये प्रसिद्ध कलाकारांसह नवोदित कलाकारांना स्वरमंच उपलब्ध करून दिला जाणार आहे. मंगळवार ते शनिवार (८ ते १२) दरम्यान डी. पी. रस्त्यावर असलेल्या मजेंटा लॉन्स महोत्सव पार पडेल.
महाराष्ट्र, कर्नाटक आणि गुजरातमधील परंपरांचा संगम साधत हा शारदोत्सव पार पडेल. शारदोत्सवाचे उद्‍घाटन मंगळवार (ता. ८) सायंकाळी साडेपाच वाजता होणार, अशी माहिती जीएसबी संयुक्त कोकणी सभेचे अध्यक्ष अरुण किणी आणि उपाध्यक्ष जनार्दन भट यांनी गुरुवारी (ता. ३) पत्रकार परिषदेत दिली. सभेचे सचिव मंजुनाथ नायक आणि खजिनदार बिपिन पंडित यावेळी उपस्थित होते. ज्ञान-कला आणि बुद्धीची देवता असलेल्या देवी सरस्वतीची आराधना करण्यासाठी पुण्यात शारदोत्सव सुरू करण्यात येत आहे. या अंतर्गत आयोजित धार्मिक, सांस्कृतिक, सामाजिक व आरोग्यविषयक उपक्रम सर्वांसाठी खुले आहेत.