पुणे, ता. ३ : शालेय विद्यार्थ्यांची वाहतूक करणाऱ्या बसचालकाने अल्पवयीन मुलींचा विनयभंग केल्याची घटना समोर आली आहे. या निंदनीय घटनेची गांभीर्याने दखल घेत डॉ. नीलम गोऱ्हे यांनी परिवहन आयुक्त विवेक भिमनवार यांना सुरक्षाविषयक उपाययोजनांबाबत काटेकोर पालन करण्याचे निर्देश दिले आहेत.
त्यांनी अनेक सूचना केल्या आहेत. ‘महाराष्ट्र मोटार वाहन नियम २०११ आणि शालेय शिक्षण व क्रीडा विभागाच्या निर्णयानुसार शाळांमधील विद्यार्थी-विद्यार्थिनींच्या सुरक्षाविषयक उपाययोजनांची काटेकोर अंमलबजावणी करण्यात यावी. शालेय विद्यार्थ्यांची वाहतूक करणाऱ्या वाहनांची तपासणी वारंवार करण्यात यावी. पोलिसांकडून वाहनचालक आणि इतर मदतनीसांच्या चारित्र्याची पडताळणी केली जावी. प्रत्येक वाहनामध्ये महिला मदतनीस ठेवाव्यात. वाहनामध्ये क्षमतेपेक्षा जास्त विद्यार्थी बसवू नयेत. वाहनाचा वेग मर्यादित असावा. वाहन तांत्रिकदृष्ट्या पूर्णतः योग्य असावे. शाळेच्या प्राचार्य आणि मुख्याध्यापकांनी वाहनचालक व सहाय्यकांना सूचना द्याव्यात. वैद्यकीय अधिकाऱ्यांमार्फत वाहन चालकांची शारीरिक व मानसिक चाचणी करावी. राज्यात अशा प्रकारच्या घटना घडणार नाहीत याकडे लक्ष द्यावे,’ अशा सूचना डॉ. गोऱ्हे यांनी दिल्या आहेत.
-------