पुणे, ता. २५ : सरकारी यंत्रणा आणि निवडणूक आयोगासारख्या स्वायत्त संस्थांवर दबाव आणला जात आहे. देशातील निवडणूका लोकशाही मार्गाने, निःपक्षपातीपणे आणि भयमुक्त वातावरणात व्हायला हव्यात. निवडणूक आयोगानेही निःपक्ष राहावे, अशी अपेक्षा व्यक्त करीत संविधान वाचविण्यासाठी नागरिकांनी भाजपविरोधी मतदान करावे, असे आवाहन ‘भारत जोडो अभियाना’चे इब्राहिम खान यांनी गुरुवारी पत्रकार परिषदेत केले. या वेळी विविध सामाजिक संघटनांचे प्रतिनिधी उपस्थित होते.
लोकसभा निवडणूक जाहीर होण्याआधी आणि जाहीर झाल्यानंतर घडलेल्या घटनांची माहिती देऊन देशातील यंत्रणांवर भाजपचा प्रचंड दबाव असल्याचा आरोप या वेळी करण्यात आला. येणाऱ्या काळात निवडणुकाच रद्द होण्याची शक्यता आहे. तेव्हा जागरूक नागरिकांनी पुढाकार घेतला पाहिजे. सध्या सर्वच संस्थांना गुलाम बनविले जात आहे. तसेच भाजप संविधान बदलण्याचा प्रयत्न करीत असल्याचा आरोपदेखील या वेळी करण्यात आला.
या पत्रकार परिषदेस दीप बर्वे (युवक क्रांती दल), प्रशांत कोठडिया (संवैधानिक राष्ट्रवाद मंच), उत्पल व. बा. (निर्भय बनो), प्रसाद झावरे (पुणे कलेक्टिव्ह) श्रीरंजन आवटे, उमेश ठाकूर, एकनाथ पाठक आदी उपस्थित होते.