पुणे, ता. ११ : एनडीए रस्त्यावरील उत्तमनगर परिसरात सुरू असलेल्या पुलाच्या बांधकामाच्या ठिकाणी हातबॉम्ब (हँड ग्रेनेड) आढळून आला. पुणे पोलिसांच्या बॉम्ब शोधक व नाशक पथकाने (बीडीडीएस) हात बॉम्ब सुरक्षित ठिकाणी नेऊन निकामी केला.

उत्तमनगर परिसरातील कमला देवी मंदिराच्या परिसरात पुलाचे काम सुरू आहे. या भागात खोदकाम करताना हातबॉम्ब सापडला. या घटनेची माहिती तेथील कामगारांनी त्वरित उत्तमनगर पोलिसांना दिली. घटनेची माहिती मिळताच परिमंडळ तीनचे पोलिस उपायुक्त संभाजी कदम, उत्तमनगर पोलिस ठाण्याचे वरिष्ठ पोलिस निरीक्षक वाय. एन. शेख, गुन्हे शाखेचे निरीक्षक कदम, उपनिरीक्षक अनुसे, तसेच दहशतवाद विरोधी पथकातील अधिकाऱ्यांनी घटनास्थळी धाव घेतली. बॉम्ब शोधक व नाशक पथकाला घटनास्थळी पाचारण करण्यात आले. बॉम्ब शोधक पथकाने हात बॉम्बची तपासणी केली. त्यानंतर हातबॉम्ब जिवंत नसल्याची खात्री करण्यात आली. हातबॉम्ब सुरक्षित ठिकाणी नेऊन निकामी करण्यात आला.