तळेगाव स्टेशन, ता. २ : मावळ तालुक्यातील कुंडमळा येथे गुरुवारी (ता. २) सायंकाळी इंद्रायणी नदीत पोहण्यासाठी उतरलेल्या दोघांचा पाण्याचा खोलीचा अंदाज न आल्याने बुडून मृत्यू झाला. साजीद शरीफ बागवान (वय २०, रा. निगडी, पुणे) आणि आतीक शरीफ बागवान (वय १५, रा. जळगाव) अशी मृतांची नावे आहेत. दोघे बुडाल्याची माहिती मिळाल्यानंतर एमआयडीसी पोलिस ठाण्याचे सहाय्यक पोलिस निरीक्षक एस. टी. म्हस्के, हवालदार प्रशांत सोरटे, अंमलदार सुरेश जाधव यांनी घटनास्थळी धाव घेतली. वन्यजीव रक्षक मावळ संस्था, आपदा मित्र मावळ, शिवदुर्ग मित्र लोणावळ्याच्या पथकाला शोधमोहीमेसाठी पाचारण करण्यात आले. नीलेश गराडे, प्रशांत भालेराव, गणेश गायकवाड, भास्कर माळी, अविनाश कारले, सागर भेगडे, अनिश गराडे, गणेश सोंडेकर आदींनी नदीपात्रात उतरून दीड तास शोध घेतल्यानंतर साडेसातच्या सुमारास दोघांचे मृतदेह हाती लागले. तळेगाव दाभाडे प्राथमिक आरोग्य केंद्रात शवविच्छेदन केल्यानंतर मृतदेह नातेवाइकांच्या ताब्यात देण्यात आले. मयत दोघे रस्त्याकडेला फळविक्रीचा व्यवसाय करत असल्याचे पोलिसांनी सांगितले.