पुणे, ता. २७ ः ‘इंडियन इम्युनोलॉजिकल लिमिटेड’ (आयआयएल) कंपनीद्वारे ऑस्ट्रेलियातील ग्रिफिथ युनिव्हर्सिटीच्या सहकार्याने कोडॉन डीऑप्टिमायझेशन तंत्रज्ञानाचा वापर करून एसएआरएस-सीओव्ही- विरुद्ध लाईव्ह-एटेन्युएटेड सुई नसलेली इंट्रा-नोझल बूस्टर लस विकसित करण्यात आली आहे. कोविड-१९ लसीवरील हे महत्त्वपूर्ण काम सोमवारी (ता. २६) विज्ञान जर्नल ‘नेचर कम्युनिकेशन्स’ मध्ये प्रकाशित झाले आहे.
कोविड १९ चा धोका अजूनही संपलेला नाही. कोविड-१९ मुळे अजूनही जगभरात एका आठवड्यात सुमारे १ हजार ७०० लोकांचा बळी जात आहे. त्यामुळे जागतिक आरोग्य संघटनेतर्फे जोखीम असलेल्या लोकांना बूस्टरसह लसीकरण करत राहण्याचे आवाहन करण्यात आले आहे. कोडोन डीऑप्टिमायझेशन तंत्रज्ञानाचा वापर करून विकसित केलेली एसएआरएस-सीओव्ही- विरुद्ध लाईव्ह-एटेन्युएटेड सुई नसलेली इंट्रा-नोझल बूस्टर लस उल्लेखनीय स्थिरता दर्शवते. प्राण्यांवर केलेल्या अभ्यासात ही लस सुरक्षित असल्याचे निरीक्षण नोंदविण्यात आले आहे.
‘इंडियन इम्युनोलॉजिकल लिमिटेड’चे ​​व्यवस्थापकीय संचालक डॉ. के आनंद कुमार म्हणाले, ‘‘ही उपलब्धी म्हणजे कोविड-१९ विरुद्धच्या लढाईतील एक मोठे पाऊल आहे. या लसीचा विकास सार्वजनिक आरोग्यामधील नावीन्यपूर्णतेसाठीचे आमचे समर्पणच दर्शवत नाही, तर नवीन तंत्रज्ञानाचा अवलंब करण्याची आयआयएलची क्षमतादेखील दर्शवते. आमची अग्रगण्य इंट्रानोझल लस संसर्गजन्य आजारांविरुद्धच्या लढ्यात क्रांती घडवून आणण्यासाठी तयार आहे. लसीकरणाचा दर वाढविणे हे आमचे ध्येय आहे’’
‘इंडियन इम्युनोलॉजिकल लिमिटेड’चे उपव्यवस्थापकीय संचालक डॉ. प्रियब्रता पटनाईक म्हणाले, ‘‘आमच्या रिलर्च आणि डेव्हलपमेंट समूहाने या नावीन्यपूर्ण लसीच्या निर्मितीसाठी प्रचंड प्रयत्न केले आहेत. या लसीच्या एका डोसने संरक्षणात्मक प्रतिकारशक्ती निर्माण करून ही लस सुरक्षा प्रदान करते, याचा आम्हाला अभिमान वाटतो.’’