पुणे, ता. ५ : महापालिकेने पर्यावरणपूरक गणेशोत्सव साजरा करण्यासाठी पुणेकरांसाठी खास उपक्रम राबविला आहे. नागरिकांनी पीओपीच्या मूर्ती घेण्यापेक्षा शाडू मातीची मूर्ती घ्यावी यासाठी ‘मूर्ती आमची, किंमत तुमची’ हा उपक्रम हाती घेतला आहे. घोले रस्ता आर्ट गॅलरीमध्ये शुक्रवारी (ता. ६) व शनिवारी (ता. ७) सकाळी १० ते संध्याकाळी ६ या वेळेत मूर्ती उपलब्ध असणार आहेत. अशी माहिती महापालिका प्रशासनातर्फे सांगण्यात आले आहे.
महापालिकेचा पर्यावरण विभाग आणि लिबर्टी अर्थवेअर आर्ट या संस्थेच्या माध्यमातून हा उपक्रम राबविला जाणार आहे. शाडू मातीचा वापर करून भक्तीसंगम प्रकारच्या मातीच्या मूर्ती उपलब्ध करण्यात आल्या आहे. या मूर्तीचे वैशिष्ट्य म्हणजे, ही अवघ्या दोन तासांत पाण्यात विरघळते. घरी मूर्ती विसर्जित केल्यास ही माती कुंडीमध्ये वापरता येऊ शकते.
नागरिकांनी पर्यावरण पूरक गणेशोत्सव साजरा करावा, घरी गणपती बसविताना नैसर्गिक साहित्य, जैवविघटनशील साहित्याचा वापर करावा. पीओपीची मूर्ती न वापरता नागरिकांनी शाडू मातीच्या मूर्ती खरेदी करण्यास प्राधान्य द्यावे, असे आवाहन महापालिकेने केले आहे.

मूर्ती दान करा खत मिळवा
महापालिकेने विसर्जनासाठी हौदाची सोय केली आहे. पण त्याचसोबत मूर्तीदान संकलन केंद्रही सुरू केली आहेत. यंदा मूर्ती दान केल्यास नागरिकांना तीन किलोची खताची पिशवीही भेट दिली जाणार आहे. यासाठी प्रत्येक क्षेत्रीय कार्यालयाकडे १ हजार याप्रमाणे एकूण १५ हजार खताच्या पिशव्या उपलब्ध करून देण्यात आल्या आहेत. पर्यावरणपूरक गणेशोत्सवासाठी हा उपक्रम सुरू केला आहे.