पुणे, ता. ११ ः वाहन कर्ज मिळवून देण्याच्या आमिषाने महिलेची दोन लाख १२ हजार रुपयांची फसवणूक केल्याप्रकरणी एकास भारती विद्यापीठ पोलिसांनी अटक केली आहे. शंभूराजे पाटील असे अटक करण्यात आलेल्याचे नाव आहे. याबाबत एका महिलेने भारती विद्यापीठ पोलिस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिला पिंपरी परिसरात राहायला आहेत. महिलेने एका चारचाकी शोरूममध्ये मोटार खरेदीसाठी नोंदणी केली होती. त्यावेळी महिलेची एका ओळखीच्या व्यक्तीमार्फत पाटील याच्याशी ओळख झाली होती. एका खासगी वित्तीय संस्थेकडून कर्ज मिळवून देतो असे आमिष पाटील याने महिलेला दाखविले होते. त्यानंतर कर्ज प्रकरणासाठी जामीनदार, प्रादेशिक परिवहन कार्यालयातील नोंदणी, तसेच वाहन कर्ज प्रक्रियेसाठी शुल्क भरावे लागते, अशी बतावणी करून पाटीलने महिलेकडून दोन लाख १२ हजार २०० रुपये घेतले. महिलेकडून पैसे घेतल्यानंतर त्याने कर्ज मिळवून दिले नाही. फसवणूक झाल्याचे लक्षात आल्यानंतर महिलेने पोलिसांकडे तक्रार दिली.