पुणे, ता. १० : राष्ट्रीय संरक्षण प्रबोधिनीत (एनडीए) पहिल्या वर्षात प्रशिक्षण घेत असलेल्या कॅडेटने गळफास घेऊन आत्महत्या केल्याची घटना शुक्रवारी (ता. १०) पहाटे उघडकीस आली. अंतरिक्ष कुमार सिंह (वय १८) असे या कॅडेटचे नाव आहे.
‘एनडीए’ प्रशासनाने दिलेल्या माहितीनुसार, अंतरिक्ष हा सकाळच्या प्रशिक्षणासाठी गैरहजर होता. त्यामुळे त्याच्या सहकारी कॅडेट्सनी अंतरिक्षचा शोध घेतला. त्यावेळी अंतरिक्ष त्याच्या खोलीमध्ये बेशुद्धावस्थेत आढळून आला. त्याला तातडीने खडकवासला येथील लष्करी रुग्णालयात दाखल करण्यात आले. मात्र, वैद्यकीय अधिकाऱ्यांनी सकाळी त्याला मृत घोषित केले. या घटनेची माहिती त्याचे कुटुंबीय आणि स्थानिक पोलिसांना दिली. या प्रकरणाचा तपास करण्यासाठी ‘कोर्ट ऑफ इन्क्वायरी’ नेमण्यात आली आहे.
अंतरिक्ष हा मूळचा लखनौचा रहिवासी होता. त्याचे वडील भारतीय लष्करातून निवृत्त झाले असून, ते सध्या डिफेन्स सेक्युरिटी कॉर्प्समध्ये (डीएससी) नोकरीस आहेत. आर्मी पब्लिक स्कूलचा माजी विद्यार्थी असलेला अंतरिक्ष पहिल्याच प्रयत्नात ‘एनडीए’ची परीक्षा उत्तीर्ण झाला होता. भारतीय हवाई दलात जाण्याचे त्याचे स्वप्न होते. दरम्यान, या प्रकरणी उत्तमनगर पोलिस ठाण्यात अकस्मात मृत्यूची नोंद करण्यात आल्याची माहिती वरिष्ठ पोलिस निरीक्षक मोहन खंदारे यांनी दिली.