पुणे, ता. २८ : शहरात मोबाईल चोरी व जबरी चोरीच्या घटनांमध्ये वाढ झाल्याच्या पार्श्वभूमीवर हडपसर पोलिसांनी मोठी कारवाई करत एका सराईत आरोपीला अटक केली. यात पोलिसांनी ३८ मोबाईल, तीन दुचाकी आणि जबरी चोरीच्या दोन घटनांची उकल केली.
पोलिसांनी दिलेल्या माहितीनुसार, २४ मार्चला पहाटे साडेतीनच्या सुमारास फिर्यादी हडपसर येथे भाजी मंडईत रिक्षाची वाट पाहत होत्या. त्यावेळी दुचाकीवर आलेल्या दोघांनी फिर्यादीच्या हातातील मोबाईल जबरदस्तीने हिसकावून पळ काढला. या प्रकरणी हडपसर पोलिस ठाण्यात गुन्हा दाखल केला होता. गुन्ह्याचे गांभीर्य लक्षात घेऊन परिमंडळ पाचचे पोलिस उपायुक्त डॉ. राजकुमार शिंदे यांच्या मार्गदर्शनाखाली, वरिष्ठ पोलिस निरीक्षक संजय मोगले, पोलिस निरीक्षक (गुन्हे) नीलेश जगदाळे यांच्या सूचनेनुसार तपास पथक कार्यरत होते. तपासादरम्यान आरोपी विकास ऊर्फ आकाश सुरेश वाघिरे (वय २१, रा. शिवाजीनगर, पुणे) याच्यासह एका अल्पवयीन मुलाला ताब्यात घेतले आहे.
चौकशीत आरोपींनी हडपसर, लोणीकाळभोर, खडकी, चंदननगर पोलिस ठाण्याच्या हद्दीत गुन्हे केल्याचे उघड झाले. आरोपींकडून ३८ मोबाईल आणि तीन दुचाकी जप्त केल्या असून, मुद्देमालाची किंमत पाच लाख २० हजार रुपये आहे. सहाय्यक पोलिस निरीक्षक अर्जुन कुदळे तपास करीत आहेत.