पुणे, ता. १० : गणेशोत्सवामध्ये आपल्या बहारदार वादनातून पुणेकरांना ढोल-ताशाच्या तालावर थिरकायला लावणारे वादक आता क्रिकेटच्या मैदानात आमनेसामने येणार आहेत. शिवमुद्रा ढोल-ताशा-ध्वज पथकातर्फे मंगळवारपासून (ता. ११) रविवारपर्यंत (ता. १६) आंतरपथक टेनिस बॉल क्रिकेट स्पर्धेचे आयोजन करण्यात आले आहे. सिंहगड रस्त्यावरील व्हीजन क्रिकेट ॲकॅडमीत ही स्पर्धा रंगणार आहे.
पुणे पोलिस परिमंडळ तीनचे उपायुक्त संभाजी कदम, लोकमान्य सोसायटीचे झोनल हेड सुशील जाधव, जगदंबा हॉटेलचे संचालक गणेश पायगुडे व अजित पायगुडे, काका हलवाई स्वीट्सचे संचालक प्रथमेश गाढवे व पुण्यातील मानाच्या गणपती मंडळांच्या पदाधिकाऱ्यांच्या हस्ते मंगळवारी सायंकाळी ६ वाजता स्पर्धेचे उद्‌घाटन होईल.
या स्पर्धेत पुण्यातील १६ ढोल-ताशा पथकांचे संघ सहभागी होणार आहेत. पुणे श्रमिक पत्रकार संघाचा एक संघही या स्पर्धेत सहभागी झाला असून, पुण्यातील सर्व नामवंत वृत्तसंस्थांचे प्रतिनिधी या स्पर्धेत खेळणार आहेत. याशिवाय पुणे पोलिसांचा महिला संघ, शिवमुद्रा पथकाचा महिला संघ, ढोल-ताशा-महासंघ, गणेश मंडळांच्या कार्यकर्त्यांचा संघ, असे काही प्रदर्शनीय सामनेही या वेळी खेळवले जाणार आहेत. या स्पर्धेत विमलाबाई गरवारे प्रशाला, ताल, नादब्रह्म, गजर, रमणबाग युवा मंच, युवा वाद्य पथक, शिवतेज, अभेद्य, गंधार, रूद्ररूपम, राजमुद्रा, स्वराज्य, शिवप्रताप, श्रीराम व शिवसाम्राज्य या पथकांचे संघ खेळतील. स्पर्धा दिवस-रात्र स्वरूपाची असल्याने सकाळी व सायंकाळी दोन्ही वेळेला सामने होतील, अशी माहिती शिवमुद्रा पथकाचे अध्यक्ष आशुतोष देशपांडे यांनी दिली.