पुणे, ता. ८ ः महाराष्ट्र साहित्य परिषदेतर्फे (मसाप) देण्यात येणारा ज्येष्ठ भाषा अभ्यासक व लेखिका डॉ. अंजली सोमण पुरस्कृत ‘मसाप जीवनगौरव पुरस्कार’ यंदा ज्येष्ठ लेखक ‘उचल्या’कार लक्ष्मण गायकवाड यांना जाहीर झाला आहे. तसेच, ‘डॉ. भीमराव कुलकर्णी कार्यकर्ता पुरस्कार’ स्त्रीवादी चळवळीतील कार्यकर्त्या डॉ. गीताली वि. मं. यांना जाहीर झाला आहे.
‘मसाप’चे कार्याध्यक्ष प्रा. मिलिंद जोशी यांनी ही माहिती दिली. २५ हजार रुपये आणि सन्मानपत्र असे जीवनगौरव पुरस्काराचे स्वरूप असून, ११ हजार रुपये आणि सन्मानपत्र, असे कार्यकर्ता पुरस्काराचे स्वरूप आहे. हे पुरस्कार २७ मे रोजी ‘मसाप’च्या माधवराव पटवर्धन सभागृहात आयोजित १२०व्या वर्धापनदिन सोहळ्यात अध्यक्ष डॉ. रावसाहेब कसबे यांच्या हस्ते प्रदान करण्यात येणार आहेत. याप्रसंगी मसापच्या विश्वस्त मंडळाचे अध्यक्ष डॉ. शिवाजीराव कदम, कार्यकारी विश्वस्त डॉ. पी. डी. पाटील, विश्वस्त यशवंतराव गडाख, उपाध्यक्ष डॉ. तानाजीराव चोरगे, राजीव बर्वे आणि विद्याधर अनास्कर उपस्थित राहणार आहेत.
प्रा. जोशी म्हणाले, ‘‘लक्ष्मण गायकवाड यांना ‘उचल्या’ या आत्मकथनाने ओळख मिळवून दिली. १९८८चा साहित्य अकादमी पुरस्कार या आत्मकथनाला मिळाला. त्यांनी आजवर आपल्या लेखनातून परिघाबाहेरील उपेक्षितांच्या व्यथा आणि वेदना मांडून त्यांचा आवाज बुलंद केला आहे. डॉ. गीताली वि. मं. यांनी स्त्री मुक्तीच्या चळवळीत मोलाचे योगदान दिले आहे. स्त्रीवादी चळवळीला ५० वर्षे पूर्ण होत असताना डॉ. गीताली वि. मं. यांच्या कार्याचा ‘डॉ. भीमराव कुलकर्णी कार्यकर्ता पुरस्कार’ देऊन गौरव करताना परिषदेला आनंद होत आहे.’’