पुणे, ता. १४ ः शहरातील झाडांचे संवर्धन आणि त्यांची निगा राखण्यासाठी पुणे महापालिकेतर्फे ‘वृक्ष रुग्णवाहिका’ (ट्री ॲब्युलन्स) हा उपक्रम सुरू केला जाणार आहे. जागतिक पर्यावरण दिनाच्या निमित्ताने ५ जूनपासून ही सेवा उपलब्ध होईल, अशी माहिती अतिरिक्त आयुक्त ओमप्रकाश दिवटे यांनी दिली.

खिळे काढून टाकणार
पुणे शहरातील अनेक झाडांवर अनधिकृत जाहिरात फलक लावण्यासाठी खिळे ठोकले जातात. यामुळे झाडांची वाढ थांबते आणि त्यांचे आयुष्य कमी होते. महापालिकेच्या वृक्ष रुग्णवाहिकेद्वारे अशा झाडांची तपासणी केली जाईल आणि त्यांच्यावर असलेले खिळे, फलक तसेच इतर अडथळे हटविले जातील.

झाडांसाठी विशेष यंत्रणा
या वृक्ष रुग्णवाहिकेत झाडांची काळजी घेण्यासाठी आवश्यक साधने आणि कर्मचाऱ्यांची तुकडी असेल. उद्यान विभागाच्या सहकार्याने संपूर्ण शहरात हा उपक्रम राबविला जाणार आहे. झाडांची स्थिती तपासून, त्यांना आवश्यक ते उपचार दिले जातील.

नागरिकांसाठी हेल्पलाइन
महापालिका विशेष हेल्पलाइन क्रमांक सुरू करण्याच्या तयारीत आहे. नागरिकांनी आपल्या परिसरातील झाडांबाबतची माहिती या क्रमांकावर कळविल्यास वृक्ष रुग्णवाहिका संबंधित ठिकाणी जाऊन झाडांची देखभाल करेल. यासाठी पालिकेमार्फत कर्मचारीही नियुक्त केले जाणार आहेत.

झाडांची सुकणारी स्थिती थांबविणार
शहरात विकासकामे, वादळामुळे होणारे नुकसान आणि झाडांवर केले जाणारे अतिक्रमण यामुळे झाडे तोडली जात आहेत किंवा सुकत आहेत. हे थांबविण्यासाठी आणि पर्यावरण संवर्धनासाठी महापालिकेने हा उपक्रम राबवण्याचा निर्णय घेतला आहे.

शहरातील झाडांना खिळे ठोकल्यामुळे त्यांचे आयुष्य कमी होते. झाडांची वाढ खुंटते, झाडे वाळून जातात. हे प्रकार रोखण्यासाठी ‘वृक्ष रुग्णवाहिका’ उपक्रम पाच जूनपासून सुरू होणार आहे. यामध्ये शहरातील सामाजिक संस्थांनी सहभाग घ्यावा.
- ओमप्रकाश दिवटे, अतिरिक्त आयुक्त, पुणे महापालिका