पुणे, ता. ६ ः पुणे रसिक कलारंजन, एकपात्री कलाकार परिषद आणि निळू फुले कला अकादमी यांच्यावतीने सिद्धहस्त लेखक जयवंत दळवी यांच्या कथांवर आयोजित केलेल्या कथाकथन स्पर्धेत अनिता पाटील यांनी प्रथम क्रमांक पटकावला. पल्लवी परब भालेकर यांनी द्वितीय तर धनंजय जोशी यांना तृतीय क्रमांक मिळाला.
जयवंत दळवी यांच्या जन्मशताब्दीनिमित्त या स्पर्धेचे आयोजन करण्यात आले. यावेळी नाट्यपरिषदेच्या उपाध्यक्षा शोभा कुलकर्णी यांच्या हस्ते एकपात्री कलाकार व अभिनेत्री अंजली कऱ्हाडकर यांना बालगंधर्व पुरस्कार प्रदान करण्यात आला.
‘सकाळ’चे मुख्य उपसंपादक व विनोदी साहित्यकार सु. ल. खुटवड यांच्या हस्ते पारितोषिकांचे वितरण करण्यात आले. यावेळी रसिक कलारंजनचे संस्थापक बिपिन दफ्तरदार, निळू फुले कला अकादमीचे अध्यक्ष पपीचंद श्रीश्रीमाळ, ‘एकपात्री’च्या उपाध्यक्षा मंजुषा जोशी आदी यावेळी उपस्थित होते. ज्योती कानेटकर, ज्योती ब्रह्मे आणि प्रिया उंडे यांना कथाकथन स्पर्धेत उत्तेजनार्थ पारितोषिक देण्यात आले. रवींद्र देशपांडे व कल्पना देशपांडे यांनी या स्पर्धेचे परीक्षक म्हणून काम पाहिले. संध्या कुलकर्णी यांनी प्रास्ताविक केले. अनुपमा कुलकर्णी यांनी सूत्रसंचालन केले.
फोटोः 37868, 37869