पुणे, ता. २४ ः सुरक्षेच्या कारणास्तव पुण्यासह देशातील २० विमानतळांवर प्रवाशांना छायाचित्रे काढण्यास मज्जाव करण्यात आला आहे. ‘डीजीसीए’ने शुक्रवारी नवीन मार्गदर्शन सूचना जाहीर केल्या असून, त्यानुसार पुणे विमानतळावर उड्डाण करणाऱ्या अथवा उतरणाऱ्या विमानांतील प्रवाशांना विमान १० हजार फूट उंचीच्या आत असेल तर खिडकीचे आवरण बंद ठेवण्याच्या सूचना देण्यात आल्या. त्याची अंमलबजावणी सुरू झाली असून, विमान कंपन्या तशा सूचना प्रवाशांना देत आहेत.
पुणे विमानतळ हे हवाईदलाचे तळ असल्याने सुरक्षेच्या दृष्टीने अत्यंत संवेदनशील आहे. भारत आणि पाकिस्तान दरम्यान निर्माण झालेल्या तणावानंतर ‘डीजीसीए’ने पहिल्यांदाच १० हजार फूट उंचीपर्यंत प्रवाशांना खिडकीतून छायाचित्रीकरण करण्यास बंदी घातली आहे. ‘डीजीसीए’ तशा सूचना विमान कंपन्यांना दिल्यानंतर विमान कंपन्यांनी लगेच त्याची अंमलबजावणीदेखील सुरू केली आहे. पुण्याहून विमान झेपावल्यानंतर दहा मिनिटांपर्यंत आणि पुण्यात विमान उतरण्यापूर्वी दहा मिनिटे आधी प्रवाशांना खिडक्यांचे आवरण बंद करण्यास सांगितले जात आहे.

असा आहेत सूचना
- सामान्यपणे विमान कंपन्यांकडून विमानांचे उड्डाण आणि लँडिंग करतेवेळी प्रवाशांना खिडक्यांचे आवरण बंद काढण्यास सांगितले जाते
- त्याचे प्रमुख कारण विमानांच्या बाहेर पंखाजवळ काही घडत असेल ते तत्काळ कळावे म्हणून
- विमानात बसल्यानंतर प्रकाशासाठी खिडक्यांचे आवरण उघडे ठेवण्यास सांगितले जाते
- आपत्कालीन खिडकीचे आवरण उघडे ठेवण्यास सांगितले जाते व अन्य खिडक्यांचे बंद ठेवण्यास सांगितले जाते

सेल्फी, फोटोंना बंदी
- अनेक प्रवासी बोर्डिंग गेटमधून आत जाताना फोटो अथवा सेल्फी काढतात. तिथे फोटोवर बंदी घातली आहे
- एरोब्रिज नसलेल्या ठिकाणी लॅडरजवळदेखील अनेक प्रवासी फोटो काढतात. आता त्यांनादेखील मज्जाव केला आहे
- प्रशासनाने विमानतळावर ठिकठिकाणी तशा सूचनांचे फलक लावले आहेत
- प्रवाशांच्या माहितीसाठी उद्‍घोषणादेखील केल्या जात आहेत

या विमानतळाचा समावेश
पुणे, लेह, श्रीनगर, जम्मू, पठाणकोट, आदमपूर, चंडीगड, भटिंडा, जैसलमेर, बिकानेर, जोधपूर, हिंडन, आग्रा, कानपूर, बरेली, ग्वालियर, गोरखपूर, भूज, गोवा, विशाखापट्टणम आदी विमानतळांवर ‘डीजीसीए’चा नियम लागू आहे.

विमानतळाच्या आवारात प्रवाशांनी छायाचित्रीकरण करू नये म्हणून वारंवार सूचना दिल्या जात आहेत. विमान कंपन्यांनादेखील सूचना दिल्या आहेत. ‘डीजीसीए’च्या सर्व सूचनांचे पालन केले जात आहे.
- संतोष ढोके, विमानतळ संचालक, पुणे