पुणे, ता. २५ ः दिल्लीमध्ये रविवारी दुपारी वादळी वाऱ्यासह जोरदार पावसामुळे इंदिरा गांधी आंतरराष्ट्रीय विमानतळावर विमान वाहतुकीवर मोठा परिणाम झाला. दिल्लीहून झेपावणारी काही विमाने रद्द झाली, तर दिल्ली विमानतळावर दाखल होणाऱ्या विमानांना दुसऱ्या विमानतळावर उतरविण्यात आले. पुण्याहून दिल्लीला जाणाऱ्या दहाहून अधिक विमानांना याचा थेट फटका बसला आहे. पुण्याहून दिल्लीच्या दिशेने जाणारी विमाने ही अमृतसर, वाराणसी, सुरत व मुंबई विमानतळावर वळविण्यात आली. खराब हवामानाचा फटका प्रवाशांना बसला.
दिल्लीतील वातावरण बिघडल्यामुळे पुण्याहून दिल्लीला जाणाऱ्या विमानांना उशीर झाला. काही विमानांचा मार्ग बदलण्यात आला, तर दिल्लीहून झेपावणारी १०० हून अधिक विमाने रद्द करण्यात आली. यामुळे दिल्लीसह पुणे विमानतळावर प्रवाशांची गर्दी झाली होती. शनिवारच्या मध्यरात्रीपासूनच विमानाचे वेळापत्रक बिघडले. रविवारीदेखील अशीच स्थिती होती. प्रवाशांना प्रचंड मनस्ताप सहन करावा लागला. ज्या विमानांचा मार्ग बदलला, त्या प्रवाशांना सर्वाधिक फटका बसला आहे.