पुणे, ता. २७ ः तळजाई माता वसाहतीत पाच जणांच्या टोळक्याने वाहनांची तोडफोडकरून प्रचंड दहशत माजवली. वाहन तोडफोड करत असताना एकाने अडविण्याचा प्रयत्न केल्यानंतर त्यांच्या अंगावर हत्यार ठेवून जीवे मारण्याची धमकी दिल्याचा प्रकार घडला आहे.
या प्रकरणी सहकारनगर पोलिस ठाण्यात दीपक कुचेकर (वय ४३) यांनी तक्रार दिली आहे. पोलिसांनी अल्पवयीनांसह पाच जणांवर गुन्हा दाखल केला आहे. हा प्रकार सोमवारी पहाटे घडला असून, यात रिक्षा तसेच दुचाकी अशा पाच वाहनांची तोडफोड करण्यात आली.
पोलिसांच्या माहितीनुसार, पहाटे हे पाच जणांचे टोळके हातात हत्यारे व बांबू घेऊन आले. त्यांनी आरडाओरडा करत गोंधळ घालण्यास सुरुवात केली. तक्रारदार यांच्यासह इतर वाहनांच्या काचा फोडल्या. रिक्षा तसेच दुचाकींचा यात समावेश आहे. दरम्यान, अचानक झालेल्या या घटनेने परिसरात भीतीचे वातावरण पसरले. नागरिक घराबाहेर आले. त्यातील तक्रारदारांनी आरोपींना विचारणा केली. नंतर त्यावरून त्यांच्यात वादविवाद झाला व टोळक्याने गोंधळ घालून दहशत माजवली. या वेळी एकाने तक्रारदाराच्या अंगावर हत्यार ठेवून जीवे मारण्याची धमकी दिल्याचेही तक्रारीत नमूद आहे.