नरेंद्र साठे : सकाळ वृत्तसेवा
पुणे, ता. २७ : अंगणवाडी भरती प्रक्रिया आता ऑनलाइन पद्धतीने होणार आहे. आत्तापर्यंत ग्रामपंचायतीमध्ये कागदोपत्री अर्ज करण्याची पद्धत आता पुणे जिल्ह्यात नसेल. कारण, राज्यात प्रथमच पुणे जिल्हा परिषदेने अंगणवाडी सेविका आणि मदतनिसांच्या भरतीसाठी ऑनलाइन प्रणाली विकसित केली आहे. या प्रणालीमुळे रिक्त जागांवर तातडीने आणि तक्रारीविना पदभरती होण्याची अपेक्षा प्रशासनाला आहे.
सध्या अंगणवाडी सेविका आणि मदतनीस भरती प्रक्रिया सुरू आहे. त्यासाठी अर्ज करण्यापासून निवडीपर्यंत सर्व काही कागदावरच सुरू होते. आता यात बदल होणार आहे. पुणे जिल्हा परिषदेने स्वनिधीतून एक प्रणाली खासगी कंपनीकडून विकसित करून घेतली आहे. सध्या या प्रणालीची चाचणी सुरू असून, जून महिन्यामध्ये ती कार्यान्वित करण्याचा जिल्हा परिषदेचा मानस आहे. ग्रामीण भागात पूर्व शालेय शिक्षणासाठी अंगणवाडी सेविकांच्या रिक्त जागा भरण्याचा आदेश शासनाने दिला होता. त्यानुसार जिल्हा परिषद स्तरावरून भरती प्रक्रिया राबविण्यात येत आहे.
जिल्ह्यामध्ये चार हजार ३९५ अंगणवाडी सेविका आणि मदतनीस यांची पदे आहेत. त्यापैकी या भरतीमध्ये ६९९ पदांसाठी भरती सुरू आहे. त्यापैकी ५०१ पदांची भरती प्रक्रिया पूर्ण झाली आहे. शासनाने आता यापुढे ज्या प्रमाणात जागा रिक्त होतील, त्याप्रमाणात तत्काळ भरती करण्याचे आदेश दिले आहेत. त्यानुसार जिल्ह्यात रिक्त झालेल्या जागांसाठी यापुढे जिल्हा परिषदेकडून ऑनलाइन प्रणालीचा वापर केला जाणार आहे.

कागदपत्र वेळेत द्यावे लागणार
अंगणवाडी सेविका, मदतनीस पदांसाठी शैक्षणिक अर्हतेसह इतरही निकष तपासले जातात. यामध्ये बारावीची टक्केवारी, पदवीधर, पदव्युत्तर किंवा इतर शैक्षणिक गुण पाहिले जातात. याचबरोबर विधवा, अनाथ, प्रवर्ग आणि अनुभवानुसार गुणांक दिले जातात. गुणांसाठी कागदपत्रे द्यावी लागतात. ही कागदपत्रे अनेकदा उशिरा देण्याचे प्रकार होतात. त्यामुळे स्थानिक पातळीवर वादाचे प्रसंग उद्‍भवतात. हे सर्वकाही आता नवीन प्रणालीमुळे टाळता येणार आहे. सर्व कागदपत्रे वेळेत प्रणालीवर अपलोड करावे लागणार आहेत.

महत्त्वाचे फायदे...
१) पारदर्शकता : भरती प्रक्रिया ऑनलाइन झाल्यामुळे गैरव्यवहाराला आळा बसणार
२) वेळेची बचत : अर्जदारांना ग्रामपंचायतीमध्ये जाऊन अर्ज करण्याची गरज नाही
३) सुलभता : अर्जदार घरी बसूनच अर्ज व कागदपत्रे सादर करू शकणार
४) तक्रारीविना प्रक्रिया : ऑनलाइन प्रक्रियेमुळे पारदर्शकपणे गुणवत्ता यादी तयार केली जाणार
५) तातडीने पदभरती : कागदपत्रांची पडताळणी ऑनलाइन होऊन निवडलेल्या उमेदवारांना नियुक्ती आदेश ऑनलाइनच मिळणार

दृष्टिक्षेपात...
४ हजार ३९५
- अंगणवाडी सेविकांची पदे

२२
- प्रकल्प संख्या

कागदोपत्री सुरू असलेली भरती
प्रकार -- पद संख्या -- नियुक्ती संख्या
अंगणवाडी सेविका -- २०० -- १६३
अंगणवाडी मदतनीस -- ४९९ -- ३३८
एकूण -- ६९९ -- ५०१

महसूल गावनिहाय मदतनीस आणि अंगणवाडी सेविका भरती केली जाते. त्या दरम्यान कागदपत्रांबाबत तक्रारी होतात. त्यामुळे जिल्हा परिषदेकडून अंगणवाडी सेविका आणि मदतनीस भरतीसाठी प्रणाली विकसित करण्याचे काम सुरू आहे. अशा प्रकारची प्रणाली विकसित करणारी पुणे जिल्हा परिषद राज्यात पहिली आहे.
- जामसिंग गिरासे,
उपमुख्य कार्यकारी अधिकारी, महिला व बालकल्याण विभाग, जिल्हा परिषद