पुणे, ता. १७ ः ‘ग्लोबल इंडिया बिझनेस फोरम (जीआयबीएफ)तर्फे इंडिया-आफ्रिका बिझनेस कॉन्क्लेव्ह आयोजित करण्यात आली आहे. शुक्रवार (ता. १९) आणि शनिवारी (ता. २०) शिक्रापूर येथील द ग्रँड हेरिटेज रिसॉर्ट्समध्ये ही कॉन्क्लेव्ह होणार आहे. त्यात दक्षिण आफ्रिका, युगांडा, रुआंडा, अंगोला, इजिप्त, काँगो, डीआर काँगो, घाना, केनिया, टांझानिया, नायजेरिया, इथिओपिया यांसारख्या जवळपास २५ आफ्रिकन देशांचा सहभाग असेल. परिषद भारतीय सूक्ष्म, लघु आणि मध्यम उद्योगांना (एमएसएमई) आफ्रिकन व्यापार व गुंतवणूक क्षेत्राशी जोडणारा एक महत्त्वपूर्ण दुवा ठरेल,’ अशी माहिती ‘जीआयबीएफ’चे अध्यक्ष डॉ. जितेंद्र जोशी यांनी दिली.

‘‘आत्मनिर्भर भारत तेव्हाच शक्य होईल जेव्हा आपले ‘एमएसएमई’ जागतिक स्तरावर वाढतील. या कॉन्क्लेव्हच्या माध्यमातून ‘जीआयबीएफ’ भारतीय उद्योजकांना त्यांची ताकद दाखविण्यास, नवी संधी साधण्यासाठी आणि आंतरराष्ट्रीय स्तरावर व्यवसाय वाढविण्यासाठी एक व्यासपीठ उपलब्ध करून देत आहे,’’ असे जोशी यांनी सांगितले.

या कॉन्क्लेव्हद्वारे भारतीय ‘एमएसएमईं’ना आंतरराष्ट्रीय बाजारपेठेत विस्तार करण्याची संधी मिळणार असून, महत्त्वाच्या आफ्रिकन क्षेत्रांमध्ये नवे व्यवसाय व गुंतवणूक करता येऊ शकते. यासह आफ्रिकन सरकारे, राजनैतिक अधिकारी आणि उद्योग क्षेत्राशी सहकार्य वाढविण्याची संधी मिळेल, असा विश्वास ‘जीआयबीएफ’ने व्यक्त केला. अधिक माहितीसाठी आणि नोंदणीसाठी www.gibfindiaafricabusinessconclave.com या संकेतस्थळाला भेट द्यावी.