पुणे, ता. १७ ः आकाशात उडणारे हजारो ड्रोन... त्यातून साकारली जाणारी पुण्याची संस्कृती... विकसित भारताचे स्वप्न... ऑपरेशन सिंदूरमधील लष्कराची दमदार कामगिरी... अन् २०२४ मधील विकसित भारताचे साकारले गेलेले स्वप्न ही दृश्ये पाहण्यासाठी स. प. महाविद्यालयाचे मैदान खचाखच भरले होतेच, तसेच शहरातील अनेक इमारतींवरून, गल्लीबोळांमधून नागरिकांचे डोळे आकाशाला भिडले होते. पंतप्रधान नरेंद्र मोदी यांना वाढदिवसाच्या शुभेच्छा देण्यासाठी आयोजित केलेला हा अनोखा ड्रोन शो बघून पुणेकर भारावून गेले.

नरेंद्र मोदी यांच्या ७५ व्या वाढदिवसाच्या निमित्ताने केंद्रीय राज्यमंत्री मुरलीधर मोहोळ यांच्यातर्फे खास या ड्रोन शोचे आयोजन केले होते. गेल्या काही दिवसांपासून याची जय्यत तयारी सुरू होती. ड्रोन शो पूर्वी प्रसिद्ध गायक अवधूत गुप्ते यांच्या गाण्यांचा कार्यक्रम आयोजित केला होता.

गाण्याचा कार्यक्रम संपताच लगेच ड्रोन शोला सुरुवात झाली, सर्वत्र अंधार झालेला असताना निळ्या रंगामध्ये हजारो ड्रोन एकाच वेळी आकाशात उडाले आणि एकच जल्लोष झाला.

या ड्रोन शोमधून गेल्या ११ वर्षातील नरेंद्र मोदींच्या कारकिर्दीत भारताने विविध क्षेत्रांत पादाक्रांत केलेले यश दाखविण्यात आले. ड्रोनद्वारे साकारला गेलेला भारताचा नकाशा आणि त्यात उठून दिसणारा महाराष्ट्र, मानवतेचा संदेश देणारे संत ज्ञानेश्‍वर महाराज, संत तुकाराम महाराज यांची प्रतिकृती उपस्थितांच्या मनाला भावणारी होती.
छत्रपती शिवाजी महाराजांची प्रतिमा ड्रोनद्वारे साकारल्यानंतर हजारो नागरिकांच्या ‘छत्रपती शिवाजी महाराज की जय’ या घोषणेने परिसर दणाणून गेला. त्याचप्रमाणे महात्मा फुले आणि सावित्रीबाई फुले, लोकमान्य टिळक, डॉ. बाबसाहेब आंबेडकर यांच्या विचाराने नरेंद्र मोदी कशा पद्धतीने नवा भारत निर्माण करत आहेत याची माहिती देण्यात आली. पुण्याच्या गणेशोत्सवाची झलकही या ड्रोन शोद्वारे दाखविण्यात आली. २०४७ मधील विकसित भारताची संकल्पना ड्रोनच्या माध्यमातून दाखवत पंतप्रधान मोदींना वाढदिवसाच्या शुभेच्छा देण्यात आल्या.