पुणे, ता. ७ : सावित्रीबाई फुले पुणे विद्यापीठाच्या तत्त्वज्ञान विभागातर्फे केंद्रीय हिंदी संचालनालय (नवी दिल्ली) आणि सेंटर फॉर इंटिग्रल स्टडीज अँड रिसर्च (पुणे) यांच्या संयुक्त विद्यमाने ‘एकात्म मानवदर्शन आणि त्याची समकालीन प्रासंगिकता’ विषयावर दोनदिवसीय राष्ट्रीय चर्चासत्र आयोजित केले आहे. चर्चासत्राचे उद्‌घाटन बिहारचे राज्यपाल आरिफ महम्मद खान यांच्या हस्ते होणार असून, केरळचे राज्यपाल राजेंद्र आर्लेकर हे समारोप सत्रात प्रमुख पाहुणे म्हणून उपस्थित राहणार आहेत.
हे चर्चासत्र गुरुवार (ता. ९) आणि शुक्रवारी (ता. १०) विद्यापीठातील स्वराज्यरक्षक धर्मवीर छत्रपती संभाजी महाराज सभागृहात होणार आहे. कार्यक्रमाच्या अध्यक्षस्थानी विद्यापीठाचे कुलगुरू डॉ. सुरेश गोसावी असणार आहेत. यावेळी विद्यापीठाचे प्र-कुलगुरू डॉ. पराग काळकर, केंद्रीय हिंदी संचालनालयाचे संचालक प्रा. हितेंद्र कुमार मिश्रा, सेंटर फॉर इंटेग्रल स्टडीज अँड रिसर्चचे हरिभाऊ मिरासदार यांची प्रमुख उपस्थिती असणार आहे. लेखक अभिजित जोग यांचे यावेळी बीजभाषण होईल.
उद्‌घाटन सत्रानंतर डॉ. अनिरुद्ध देशपांडे, डॉ. आनंद लेले आणि डॉ. संजय तांबट हे ‘एकात्म मानवदर्शनाच्या परिप्रेक्ष्यातून शिक्षण’ विषयावर मंथन करतील. भारतीय तंत्रज्ञान संस्थेचे (मुंबई) प्रा. वरदराज बापट हे ‘एकात्म मानव दर्शन आणि आर्थिक धोरण’ या विषयावर शुक्रवारी विचार मांडणार आहेत. चर्चासत्रात ३० संशोधक विद्यार्थी शोधनिबंधाचे वाचन करणार आहेत, अशी माहिती विद्यापीठाच्या प्रभारी कुलसचिव डॉ. ज्योती भाकरे यांनी दिली.