पुणे, ता. २८ : प्रख्यात समाजसेवक डॉ. मंदाकिनी व डॉ. प्रकाश या आमटे दांपत्‍याला ‘ऑटो-इम्यून ब्लिस्टरिंग डिसीज फाउंडेशन’(एआयबीडीएफ)ने पहिला ‘गोंदण’ पुरस्कार जाहीर केला आहे. यावेळी आमटे दांपत्याच्या प्रकट मुलाखतही होईल, अशी माहिती संस्थेचे संस्थापक अशोककुमार सुरतवाला यांनी पत्रकार परिषदेत दिली. याप्रसंगी फाउंडेशनचे विश्वस्त डॉ. शरद मुतालिक, अनिरुद्ध बंबावाले, जयंत हेमाडे, विजय नांदगावकर आदी उपस्थित होते.
ज्येष्ठ पर्यावरणशास्त्रज्ञ डॉ. माधव गाडगीळ यांच्या हस्ते येत्या बुधवारी (ता. २ एप्रिल) सायंकाळी ६.३० वाजता डेक्कन जिमखान्यातील कार्यक्रमात आमटे दाम्पत्याला प्रदान करण्यात येईल. निवेदक प्रवीण जोशी त्यांची प्रकट मुलाखत घेतील. हा कार्यक्रम केवळ निमंत्रितांसाठी आहे.
त्वचा आजारांकडे समाज आजही तुच्छतेने पाहतो. त्यामुळे अशा रुग्णांना आजारासोबत अन्य अडचणींचा सामना करावा लागतो. त्यांना आर्थिक व सामाजिक संघर्षाला सामोरे जावे लागते. अशावेळी त्वचेच्या आजारांबाबत जागृती करून ‘ऑटो-इम्यून ब्लिस्टरिंग’ आजारांनी ग्रस्त लोकांना मदत करण्यासाठी आम्ही सुरू केलेला हा सामाजिक उपक्रम आहे, अशी माहिती डॉ. मुतालिक यांनी दिली.
-----