पुणे, ता. ३० ः ‘व्होट चोरी’च्या निषेधार्थ मुंबईत १ नोव्हेंबर रोजी होणाऱ्या मोर्चासाठी शहरातून किमान १० हजार कार्यकर्ते सहभागी होतील, असा निर्धार महाविकास आघाडीच्या बैठकीत गुरुवारी करण्यात आला. तसेच पुणे शहरातील मतदारयाद्यांतील गैरप्रकाराच्या विरोधात आवाज उठविण्यासाठी येत्या १५ दिवसांत पुण्यातही महामोर्चा काढण्यात येणार आहे.
मुंबईत होणाऱ्या मोर्चाच्या नियोजनासाठी पुण्यातून जाणाऱ्या कार्यकर्त्यांसाठी महाविकास आघाडीने बैठक घेतली. यावेळी राष्ट्रवादी काँग्रेस शरदचंद्र पवार पक्षाचे शहराध्यक्ष प्रशांत जगताप, काँग्रेसचे शहराध्यक्ष अरविंद शिंदे, शिवसेना उद्धव बाळासाहेब ठाकरे पक्षाचे शहरप्रमुख संजय मोरे, गजानन थरकुडे, ‘आम आदमी पक्षाचे’ शहराध्यक्ष धनंजय बेनके आणि महाराष्ट्र नवनिर्माण सेनेचे शहराध्यक्ष साईनाथ बाबर व्यासपीठावर उपस्थित होते.
भारतीय जनता पक्षाच्या व्होट चोरीचा निषेध करून त्याविरुद्ध लढा देण्यासाठी यापुढील काळात एकत्र लढा देण्याचे या बैठकीत ठरले. तसेच राष्ट्रवादी काँग्रेस शरदचंद्र पवार पक्ष, काँग्रेस, शिवसेना उद्धव बाळासाहेब ठाकरे, ‘आप’ आणि ‘मनसे’चे एकत्रित १० हजार कार्यकर्ते मुंबईतील मोर्चात जाणार आहेत. त्यासाठीचे नियोजन यावेळी निश्‍चित करण्यात आले. तसेच पुणे शहरातील मतदारयाद्यांतही अनेक गैरप्रकार झाल्याचे उघड झाले आहे. त्याबाबत तक्रार करूनही निवडणूक आयोगाने कार्यवाही केलेली नाही. त्याबाबत लवकरच महामोर्चा काढून तीव्र आंदोलन करण्यात येणार असल्याचे प्रशांत जगताप यांनी जाहीर केले. ‘मनसे’सह महाविकास आघाडीतील अनेक नेते आणि कार्यकर्ते मोठ्या संख्येने बैठकीसाठी उपस्थित होते.
----------------------