पुणे, ता. ३० ः महापालिकेच्या आरोग्य विभागाच्या कीटक प्रतिबंधक विभागातील फिल्डवर्कर सेवकांना नियुक्तीपासून वेतनश्रेणी लागू करून, त्यांना वेतन वाढ व भत्ते देण्यासंदर्भातील प्रस्ताव स्थायी समितीसमोर ठेवला आहे. त्याचा फायदा संबंधित विभागातील सेवकांना होणार आहे.
महापालिकेच्या आरोग्य विभागातील कीटक प्रतिबंधक विभागामार्फत नागरी हिवताप निर्मूलन योजनेस १०० टक्के, तर राष्ट्रीय हिवताप निर्मूलन योजनेस ५० टक्के अनुदान राज्य सरकारकडून प्राप्त होते. त्यानुसार, राज्य सरकारने मान्यता दिलेल्या १६५ फिल्डवर्कर पदांना १०० टक्के अनुदान मिळते, त्यातून संबंधित सेवकांचे वेतन दिले जाते. ११५ फिल्डवर्कर सेवकांना सहाय्यक अनुदान मंजूर झालेले नाही. त्यामुळे संबंधित कर्मचाऱ्यांनी वेतनश्रेणीला लागू असलेला वेतन ग्रेड पे व त्यांचा नेमणुकीपासूनचा फरक देण्याची मागणी महापालिकेकडे केली होती. त्यानुसार, संबंधित फिल्डवर्कर या पदाच्या सेवकांना नियुक्तीच्या तारखेपासून वेतनश्रेणी लागू करून फेर वेतन निश्‍चितीकरण करण्याचा प्रस्ताव सादर केला आहे. त्यामध्ये सुधारणा करून सेवकांना देण्यात येणारे भत्ते व वेतन श्रेणी निश्‍चित करण्याबाबत प्रस्तावामध्ये नमूद केले आहे.
-----------