पुणे, ता. १८ ः ‘गुलियन बॅरी सिंड्रोम’च्या (जीबीएस) पार्श्वभूमीवर राज्य शासनाच्या सूचनेनुसार जिल्हा परिषद प्रशासनाकडून पाण्याच्या नमुन्यांची तपासणी सुरू केली आहे. यामध्ये पहिल्या तपासणीत २२ जलस्रोतांचे नमुने हे दूषित आढळून आले, त्यापैकी केवळ सहा जलस्रोत हे ग्रामीण भागातील असून, उर्वरित स्रोत हे महापालिकेत समाविष्ट झालेल्या गावांमधील असल्याची माहिती जिल्हा परिषद प्रशासनाकडून देण्यात आली.

आत्तापर्यंत जिल्ह्यातील १४१ जलस्रोतांमधील नमुन्यांची प्रयोगशाळेत तपासणी केली. या तपासणीत पहिल्या २२ स्रोतांचे पाणी दूषित आढळले होते. पाणी व स्वच्छता आणि आरोग्य विभागाच्या समन्वयाने ही मोहीम सुरू आहे. त्यामध्ये आरोग्यसेवक हे नमुने गोळा करण्याचे काम करत असून, पाणी व स्वच्छता विभागाकडून प्रयोगशाळेतून नमुन्यांची तपासणी करून घेतली जात आहे. बावीसपैकी सोळा स्रोत हे महापालिकेत समाविष्ट झालेल्या गावांमधील आहेत, त्याबाबत दैनंदिन अहवाल घेण्यात येत आहे. त्याबाबत जिल्हा परिषदेकडून दैनंदिन आढावा बैठकीत मंत्रालयालाही माहिती देण्यात येत असल्याचे प्रशासनाकडून सांगण्यात आले. ‘जीबीएस’चा प्रादुर्भाव असलेल्या समाविष्ट गावांसह पूर्ण जिल्ह्यातीलच पाण्याच्या नमुन्यांची या मोहिमेत तपासणी केली जाणार आहे.