पुणे, ता. १० : वानवडी परिसरात झालेल्या खुनाच्या गुन्ह्यात दोन वर्षांपासून गुंगारा देणाऱ्या आरोपींना गुन्हे शाखा युनिट पाचच्या पथकाने अटक केली. कर्नाटकमधील विजापूर येथे सापळा रचून त्यांना ताब्यात घेण्यात आले.
सिकंदर आयुब शेख ऊर्फ सय्यद (वय ३४), जाकीर कादीर सय्यद (वय ४२) आणि अमिर आकील सय्यद (वय २३, तिघे रा. सय्यदनगर, हडपसर) अशी अटक केलेल्यांची नावे आहेत. आरोपींवर २०२३ मध्ये एकाचा खून केल्याचा गुन्हा दाखल आहे. तेव्हापासून ते पसार झाले होते. ते ओळख लपवून राहत होते. खून प्रकरणातील फिर्यादीला आरोपींनी प्रत्यक्ष-अप्रत्यक्ष जिवे मारण्याची धमकी दिली होती. पसार झालेले आरोपी कर्नाटकातील विजापूर भागात वास्तव्यास असल्याची माहिती गुन्हे शाखेच्या युनिट पाचला मिळाली. त्यानंतर पोलिसांच्या पथकाने तिघांना कर्नाटकातून ताब्यात घेतले. पोलिस उपायुक्त निखिल पिंगळे, सहायक आयुक्त राजेंद्र मुळीक यांच्या मार्गदर्शनाखाली वरिष्ठ पोलिस निरीक्षक संजय पतंगे, उपनिरीक्षक प्रमोद खरात, राजस शेख, प्रशांत कर्णवर, नासेर देशमुख आणि पथकाने ही कारवाई केली.

खूनाचा प्रयत्नातील आरोपी अटकेत
शिवाजीनगर रेल्वे स्थानक परिसरात एका अल्पवयीनावर किरकोळ वादातून कोयत्याने वार करून पसार झालेल्या आरोपीला गुन्हे शाखेच्या युनिट एकच्या पथकाने अटक केली. गुन्हा घडल्यानंतर आरोपी महिनाभर पसार होता. साजिद ऊर्फ बाबा नजीर लाला खान (वय २३, रा. सुखसागरनगर, बिबवेवाडी) असे अटक केलेल्याचे नाव आहे. आरोपी खान, साथीदार गौरव गणेश तेलंगी, अलोक सचिन अलगुडे यांनी दोन जुलैला शिवाजीनगर रेल्वे स्थानक परिसरात एका अल्पवयीनावर कोयत्याने वार केले होते. या हल्ल्यात मुलाचा पंजा तुटला होता. या प्रकरणी शिवाजीनगर पोलिसांनी तेलंगी आणि अलगुडे यांना अटक केली होती. तर आरोपी खान हा पसार झाला होता. तो भवानी पेठेतील अंगारशाह तकिया परिसरात थांबल्याची माहिती पोलिस कर्मचारी हेमंत पेरणे यांना मिळाली. पोलिसांनी सापळा लावून त्याला पकडले.