पुणे, ता. १० : येत्‍या आठवड्याभरात ढगाळ हवामान राहणार असून, कमाल व किमान तापमानही १ ते २ अंश सेल्सिअसने कमी होणार आहे, तर १३ ऑगस्‍टपासून घाट विभागात तुरळक ठिकाणी हलक्‍या ते जोरदार स्‍वरूपाचा पाऊस पडण्‍याची शक्‍यता हवामान विभागाने व्‍यक्‍त केली आहे.

गेल्या काही दिवसांपासून शहरात पावसाने हजेरी लावली होती मात्र, त्‍याचा जोर ओसरला आहे. रविवारी (ता. १०) शहर व उपनगरांत पावसाची नोंद झाली नाही. पुढील दोन ते तीन दिवसानंतर कमाल व किमान तापमानात घट होणार आहे. यामध्‍ये मंगळवारी कमाल २९, तर किमान २२, बुधवार व गुरुवार कमाल २८ व किमान २१, तर शुक्रवार व शनिवार कमाल २७ व किमान २० अंश सेल्सिअस राहणार असल्‍याचा अंदाज भारतीय हवामानशास्त्र विभागाने वर्तविला आहे.

शहर आणि परिसरात रविवारी सकाळी ढगाळ वातावरण होते, तर दुपारी काही ठिकाणी ऊन पडले होते. शहरात रविवारी कमाल तापमान ३१ अंश सेल्सिअस इतके, तर २१ अंश सेल्सिअस इतके किमान तापमान नोंदविण्यात आले. पुणे आणि परिसरात सोमवारी (ता. ११) कमाल तापमान आणखी कमी होणार असून, कमाल तापमान ३० अंश सेल्सिअस इतके, तर किमान तापमान २२ अंश सेल्सिअस इतके नोंदविण्यात येणार आहे. आकाश अंशतः ढगाळ राहून अतिहलक्या स्वरूपाचा पाऊस पडण्याची शक्यता वर्तविली आहे.

-------------