देवदासी, तृतीयपंथींसमवेत
रक्षाबंधन उत्साहात साजरे
धनकवडी, ता. ११ ः सालाबादप्रमाणे यंदाही सलग २१व्या वर्षी ‘सण करू साजरे-माध्यम जरासे वेगळे’ या विचारातून वंदे मातरम संघटना, संयुक्त युवा फिनिक्स सोसायटी ट्रस्ट, वीर हनुमान मित्र मंडळ आणि अखिल बुधवार पेठ देवदासी संस्था यांच्या पुढाकाराने देवदासी भगिनी आणि तृतीयपंथीयांसमवेत रक्षाबंधन साजरे करण्यात आले. बुधवार पेठेतील क्रांती चौकात हा कार्यक्रम घेण्यात आला.

वंचित आणि दृर्लक्षित घटकातील भगिनींना मुख्य प्रवाहात आणण्याचा एक छोटासा प्रयत्न असल्याचे आयोजकांनी नमूद केले. रक्षाबंधन साजरे करताना त्यांना ओवाळणी स्वरूपात भेटवस्तू, मिठाई आणि त्यांच्या लहान मुलांना डिजिटल रायटिंग पॅडचे वाटप करण्यात आले. याप्रसंगी पोलिस उपआयुक्त ऋषिकेश रावले, वरिष्ठ पोलिस निरीक्षक प्रशांत भस्मे, पोलिस निरीक्षक संतोष पांढरे, अरुण घोडके यांच्यासह वंदे मातरम संघटनेचे प्रदेश अध्यक्ष सचिन जामगे, आनंद सागरे, दत्ता सागरे, अलका शर्मा, प्रमोद बाराहाते आदी मान्यवर उपस्थित होते.

या कार्यक्रमाचे आयोजन विशाल शिदे, अमोल भुरेवार, आकाश जामगे, किरण केकाने, मंगेश केकान यांनी केले होते. या कार्यक्रमास देवदासी भगिनी आणि तृतीयपंथीय मोठ्या संख्यने उपस्थित होते.
-----------------
बुधवार पेठ ः