पुणे, ता. ११ ः पाण्याच्या बाटलीवर असलेल्या छापील किमतीपेक्षा पाच रुपये जास्त आकारणे एका हॉटेलला महागात पडले आहे. स्वीकारलेले जास्तीचे १५ रुपये ४५ दिवसांच्या आत ग्राहकाला परत द्यावे, असा आदेश जिल्हा ग्राहक तक्रार निवारण आयोगाने दिला आहे. तसेच नुकसान भरपाईपोटी पाच हजार, तक्रारीच्या खर्चापोटी दोन हजार रुपये द्यावेत, असेही आदेशात नमूद केले आहे.
छापील किमतीपेक्षा जास्त पैसे आकारल्यानंतर ग्राहक आणि हॉटेल व रेस्टॉरंट चालकांमध्ये होणारा वाद टाळण्यासाठी महत्त्वाचा ठरणार आहे. आयोगाचे अध्यक्ष अनिल जवळेकर, सदस्या शुभांगी दुनाखे आणि सरिता पाटील यांनी हा निकाल दिला.
याबाबत दीपक सिंघल यांनी अ‍ॅड. चेतन भुतडा यांच्यामार्फत गोकूळ प्युअर व्हेज विरुद्ध ग्राहक आयोगात दावा दाखल केला होता. तक्रारदार हे २१ ऑगस्ट २०२२ रोजी हॉटेलमध्ये जेवणासाठी गेले होते. जेवण झाल्यानंतर तक्रारदारांना बिल देण्यात आले. त्यावेळी तक्रारदारांच्या लक्षात आले की जेवणासोबत घेतलेल्या तीन पाण्याच्या बाटलीची छापील किंमत २० रुपये असताना २५ रुपये आकारण्यात आले होते. याबाबत तक्रारदार यांनी जास्तीचे पैसे आकारल्याबाबत हॉटेलमध्ये विचारणा केली असता, त्यांनी समाधानकारक उत्तरे दिली नाहीत. तसेच, छापील किमतीपेक्षा आकारलेली जास्तीची रक्कमदेखील परत दिली नाही. त्यामुळे तक्रारदारांनी ग्राहक आयोगात धाव घेत दावा दाखल केला. आयोगाने दोन्ही बाजूचे म्हणणे ऐकून घेत, तक्रारदारांकडून छापील किमतीपेक्षा जास्त रक्कम स्वीकारून त्रुटीयुक्त सेवा देत अनुचित व्यापार पद्धतीचा अवलंब केल्याची बाब स्पष्ट होत आहे, असे नमूद करत आयोगाने जास्तीची स्वीकारलेली रक्कम परत देण्याचा आदेश दिला.

तक्रारदारांनी मेनूकार्ड पाहून ऑर्डर दिली
याबाबत हॉटेलने लेखी जबाब दाखल केला. तक्रारदारांनी जेवण्याची ऑर्डर करण्यापूर्वी मेनूकार्ड पाहून ऑर्डर दिली. त्या कार्डमध्ये किंमत नमूद केलेली होती. त्यामुळे तक्रारदार जास्तीची रक्कम स्वीकारली असे म्हणू शकत नाही. पाण्याची बाटली खरेदी करण्यासाठी त्यांच्यावर बळजबरी केली नव्हती. कोणतीही त्रुटीयुक्त सेवा दिलेली नाही. त्रास देण्याच्या उद्देशाने ही तक्रार दाखल करण्यात आली असून, ती फेटाळण्यात यावी, असे जबाबात नमूद करण्यात आले होते.