पुणे, ता. ११ ः पर्वती भागातील मित्रमंडळ चौकात एका हार्डवेअर दुकानाचा दरवाजा उचकटून चोरट्यांनी रोकड आणि बॅटरी असा मुद्देमाल लांबविल्याची घटना घडली. याबाबत एका व्यावसायिकाने पर्वती पोलिस ठाण्यात फिर्याद दिली आहे.
पोलिसांनी दिलेल्या माहितीनुसार तक्रारदार व्यावसायिक हे सहकारनगर भागात राहायला आहेत. त्यांचे पर्वती परिसरातील मित्रमंडळ चौकात हार्डवेअरचे दुकान आहे. चोरट्यांनी रविवारी (ता. १०) मध्यरात्री दुकानाचा दरवाजा उचकटून गल्ल्यातील रोकड आणि बॅटरी असा मुद्देमाल लांबविला. रविवारी सकाळी ही घटना उघडकीस आली. पोलिस उपनिरीक्षक पवार तपास करत आहेत. दरम्यान, मार्केट यार्ड-गंगाधाम रस्त्यावरील एका गोदामातून चोरट्यांनी मोबाईल संच आणि रोकड लांबविल्याची घटना उघडकीस आली. याबाबत रखवालदाराने बिबवेवाडी पोलिस ठाण्यात फिर्याद दिली आहे.